Mazardy mazaqqa ainaldyrǵan. Shymkentte zirat shyraqshysy qabirlerdiń basyna ornatylǵan kók tastardy búldirgen. Qulpytasqa salynǵan sýret pen qorshaý "dinge jat" degen shyraqshy beinelerdi qashap óshirip, qorshaýlardy alyp tastaǵan, dep habarlaidy KTK arnasy.
Baqilyq bolǵan týǵan-týysyna quran baǵyshtaýǵa kelgender politsiiaǵa aryz túsirip, "kináliler jazalansyn" deidi. Beiitte bes týysy jatqan Núriia Ǵabdýlina mazardyń búlingenin jaqynda ǵana bilipti. Anasy men aǵasyna qoiylǵan kóktasta marqumdardyń sýreti salynǵan eken. Sol beinelerdi bázbireý qashap turyp óshirip tastaǵan. Tipti kóktasty talqandaǵany bylai tursyn, qabirge qoiylǵan qorshaýlardy da alyp tastaǵan.
"Ne sýreti, ne qorshaýy joq ekenin 3 aqpan kúni kóre sala, politsiiaǵa aryz berdik. Bir aptadan keiin kelsek, taǵy bir qabirdiń basyndaǵy beineni qashap tastaǵan. Sonda bular qazirge deiin beiitti ańdyp, marqumdardyń eskertkishin qorlap júr", – deidi Núriia Ǵabdýlina.
Musylman mazarynda júzden astam adam jerlengen. Eskileri jái tómpeshik bolyp qalsa, keiingileriniń basyna kóktastan eskertkish qoiylǵan. Qulpytastaǵy jazý sol kúii tur. Al marqumdardyń sýreti men jan-jaǵyndaǵy qorshaýy buzylǵan. Qazir munda 10-nan astam qabirdiń tas-talqany shyqqan.
Svetlana Ǵabdýlina tastaǵy beineler qalai bolsa, solai qashap óshirilgenin aitady.
"Mysaly, mynaý meniń ákeme qoiylǵan kóktastyń astyndaǵy irgetasyna deiin julyp alyp tastaǵan da, plitasyn jerge qadai salǵan. Tipti týǵan jáne ólgen kúni kórinbei qalypty", – deidi ol.
Qulpytastardy qiratyp, arýaqtardy qorlady degen osy zirattyń shyraqshysy bolyp shyqty. 37 jyldan beri ainaladaǵy birneshe qorymǵa qarailap júrgen ol ólgenderdiń tasyna sýret salyp, qorshaý salǵan durys emes dep sanaidy. Tipti, mundai nárse árýaqtardy qinaidy degen aqsaqal men onyń jamaǵaty kóktasty qashaý úshin arnaiy apparattarmen jumys istepti.
"Sýret pen it bar jerge perishte kelmeidi. Mundaida árýaqqa qansha quran baǵyshtap, qudaiy as berseń de, saýaby bolmaidy. Sondyqtan biz túsingen adamǵa jaqsylyq jasap jatyrmyz. Bul ýaǵyzda aitylady. Biz imamdarmen keńesip, kópshilikpen aqyldasyp, osylai sheshtik", – deidi shyraqshy Iýldash Rasýlmetov.
"Ózim bilemdikke" salynǵan shyraqshy qulpytastardaǵy beinelerdi óshirýmen byltyrdan bastap ainalysa bastaǵan. Tipti jaqynyn jerleýge kelgenderge de "beinesi joq belgi qoiyńdar" dep úgitteidi eken.
Búlingen beiitterdiń ishinde myna qabir de bolǵan. Qulpytasta foto bolmaýy kerek degen shyraqshy men onyń jamaǵaty fotony qyryp tastaǵan. Tek, marqumnyń týystary shaǵymdanǵan soń, bárin qalpyna keltirgen. Qazir qorshaýda, qulpytastaǵy foto da qaz-qalpynda tur.
"Shariǵattan attamadym" degen shyraqshy endi osy istegenine jaýap beredi. Politsiia "ólgen adamdardyń máiitterin jáne olar jerlengen jerdi qorlaý" babymen qylmystyq is qozǵap, tergeý júrgizip jatyr.
