مازاردى مازاققا اينالدىرعان. شىمكەنتتە زيرات شىراقشىسى قابٸرلەردٸڭ باسىنا ورناتىلعان كٶك تاستاردى بٷلدٸرگەن. قۇلپىتاسقا سالىنعان سۋرەت پەن قورشاۋ "دٸنگە جات" دەگەن شىراقشى بەينەلەردٸ قاشاپ ٶشٸرٸپ, قورشاۋلاردى الىپ تاستاعان, دەپ حابارلايدى كتك ارناسى.
باقيلىق بولعان تۋعان-تۋىسىنا قۇران باعىشتاۋعا كەلگەندەر پوليتسيياعا ارىز تٷسٸرٸپ, "كٸنەلٸلەر جازالانسىن" دەيدٸ. بەيٸتتە بەس تۋىسى جاتقان نٷرييا عابدۋلينا مازاردىڭ بٷلٸنگەنٸن جاقىندا عانا بٸلٸپتٸ. اناسى مەن اعاسىنا قويىلعان كٶكتاستا مارقۇمداردىڭ سۋرەتٸ سالىنعان ەكەن. سول بەينەلەردٸ بەزبٸرەۋ قاشاپ تۇرىپ ٶشٸرٸپ تاستاعان. تٸپتٸ كٶكتاستى تالقانداعانى بىلاي تۇرسىن, قابٸرگە قويىلعان قورشاۋلاردى دا الىپ تاستاعان.
"نە سۋرەتٸ, نە قورشاۋى جوق ەكەنٸن 3 اقپان كٷنٸ كٶرە سالا, پوليتسيياعا ارىز بەردٸك. بٸر اپتادان كەيٸن كەلسەك, تاعى بٸر قابٸردٸڭ باسىنداعى بەينەنٸ قاشاپ تاستاعان. سوندا بۇلار قازٸرگە دەيٸن بەيٸتتٸ اڭدىپ, مارقۇمداردىڭ ەسكەرتكٸشٸن قورلاپ جٷر", – دەيدٸ نٷرييا عابدۋلينا.
مۇسىلمان مازارىندا جٷزدەن استام ادام جەرلەنگەن. ەسكٸلەرٸ جەي تٶمپەشٸك بولىپ قالسا, كەيٸنگٸلەرٸنٸڭ باسىنا كٶكتاستان ەسكەرتكٸش قويىلعان. قۇلپىتاستاعى جازۋ سول كٷيٸ تۇر. ال مارقۇمداردىڭ سۋرەتٸ مەن جان-جاعىنداعى قورشاۋى بۇزىلعان. قازٸر مۇندا 10-نان استام قابٸردٸڭ تاس-تالقانى شىققان.
سۆەتلانا عابدۋلينا تاستاعى بەينەلەر قالاي بولسا, سولاي قاشاپ ٶشٸرٸلگەنٸن ايتادى.
"مىسالى, مىناۋ مەنٸڭ ەكەمە قويىلعان كٶكتاستىڭ استىنداعى ٸرگەتاسىنا دەيٸن جۇلىپ الىپ تاستاعان دا, پليتاسىن جەرگە قاداي سالعان. تٸپتٸ تۋعان جەنە ٶلگەن كٷنٸ كٶرٸنبەي قالىپتى", – دەيدٸ ول.
قۇلپىتاستاردى قيراتىپ, ارۋاقتاردى قورلادى دەگەن وسى زيراتتىڭ شىراقشىسى بولىپ شىقتى. 37 جىلدان بەرٸ اينالاداعى بٸرنەشە قورىمعا قارايلاپ جٷرگەن ول ٶلگەندەردٸڭ تاسىنا سۋرەت سالىپ, قورشاۋ سالعان دۇرىس ەمەس دەپ سانايدى. تٸپتٸ, مۇنداي نەرسە ەرۋاقتاردى قينايدى دەگەن اقساقال مەن ونىڭ جاماعاتى كٶكتاستى قاشاۋ ٷشٸن ارنايى اپپاراتتارمەن جۇمىس ٸستەپتٸ.
"سۋرەت پەن يت بار جەرگە پەرٸشتە كەلمەيدٸ. مۇندايدا ەرۋاققا قانشا قۇران باعىشتاپ, قۇدايى اس بەرسەڭ دە, ساۋابى بولمايدى. سوندىقتان بٸز تٷسٸنگەن ادامعا جاقسىلىق جاساپ جاتىرمىز. بۇل ۋاعىزدا ايتىلادى. بٸز يمامدارمەن كەڭەسٸپ, كٶپشٸلٸكپەن اقىلداسىپ, وسىلاي شەشتٸك", – دەيدٸ شىراقشى يۋلداش راسۋلمەتوۆ.
"ٶزٸم بٸلەمدٸككە" سالىنعان شىراقشى قۇلپىتاستارداعى بەينەلەردٸ ٶشٸرۋمەن بىلتىردان باستاپ اينالىسا باستاعان. تٸپتٸ جاقىنىن جەرلەۋگە كەلگەندەرگە دە "بەينەسٸ جوق بەلگٸ قويىڭدار" دەپ ٷگٸتتەيدٸ ەكەن.
بٷلٸنگەن بەيٸتتەردٸڭ ٸشٸندە مىنا قابٸر دە بولعان. قۇلپىتاستا فوتو بولماۋى كەرەك دەگەن شىراقشى مەن ونىڭ جاماعاتى فوتونى قىرىپ تاستاعان. تەك, مارقۇمنىڭ تۋىستارى شاعىمدانعان سوڭ, بەرٸن قالپىنا كەلتٸرگەن. قازٸر قورشاۋدا, قۇلپىتاستاعى فوتو دا قاز-قالپىندا تۇر.
"شاريعاتتان اتتامادىم" دەگەن شىراقشى ەندٸ وسى ٸستەگەنٸنە جاۋاپ بەرەدٸ. پوليتسييا "ٶلگەن ادامداردىڭ مەيٸتتەرٸن جەنە ولار جەرلەنگەن جەردٸ قورلاۋ" بابىمەن قىلمىستىق ٸس قوزعاپ, تەرگەۋ جٷرگٸزٸپ جاتىر.
