Byltyr qyrkúiek aiynda avtobýs pen poiyz soqtyǵysqan Shamalǵan temir jol stansasynda ainalma joldyń qurylysy bastalyp ketti. Bul jóninde Almaty oblysynyń ákimi Amandyq Batalov Nur-Sultan qalasynda ótip jatqan brifing barysynda aitty, dep habarlaidy "Ult aqparat".
«Shamalǵan stansasynda ainalma joldyń qurylysy bastalyp ketti. Kelesi jyly kúzde iske qosylady dep josparlap otyrmyz. Bul maqsatqa shamamen 4 mlrd teńgedei qarjy bólingen. Osy ainalma jol iske qosylǵanda barlyq qaýip-qater joiylady dep oilaimyn. Qiyn jaǵdaidan keiin iske kiristik, burynnan jasaityn jumys edi», - dedi A.Batalov.
Eske salsaq, ótken jyly 15 qyrkúiekte Shamalǵan stansasynda relstiń ústinde turyp qalǵan jolaýshylar avtobýsy men jolaýshylar poiyzy soqtyǵysqan bolatyn. Saldarynan avtobýs júrgizýshisi sol jerde mert bolyp, taǵy 3 adam Qarasai aýdandyq aýrýhanasynyń jansaqtaý bólimine tústi.
Aita keteiik, dál osy Shamalǵan temir jol stansasynyń janynan jaiaý júrginshiler kópiri salyndy. Endi avtokólikke arnalǵan ainalma joldyń qurylysy júrip jatyr.
