«Azamattarǵa arnalǵan úkimet» «Qazpochta» AQ-men birlesip, pilottyq jobany iske qosty. Sonyń arqasynda HQKO joq shalǵai eldi mekenderdiń turǵyndary memlekettik korporatsiianyń qyzmetterin «Qazpochta» AQ aýyldyq bólimshelerinde ala alady, dep jazady "Ult aqparat".
Ázirshe 66 memlekettik qyzmet kórsetiledi, onyń ishinde elektrondyq anyqtamalardy berý, balanyń týylýyn tirkeý, balanyń týylýy men kútimine bailanysty járdemaqy taǵaiyndaý, jyljymaityn múlik obektilerine tehnikalyq pasporttyń telnusqasyn berý, zapastaǵy ofitserlerge áskeri biletter jáne olardyń telnusqalaryn (áskeri bilettiń ornyna ýaqytsha kýálikter) berý jáne taǵy da basqa qyzmetter bar.
«Azamattar arnalǵan úkimet» memlekettik korporatsiiasynyń tóraǵasy Abylaihan Ospanovtyń aitýynsha, memlekettik korporatsiiada shalǵaidaǵy aýyldyq okrýg turǵyndarynyń memlekettik qyzmetterdi erkin alýyna erekshe nazar aýdarylyp keledi. Osylaisha, 2012 jyldan bastap búkil Qazaqstan boiynsha 70 mobildik HQKO jumys isteidi, olar ákimdikterdiń ótinimderi boiynsha eldi mekenderge shyǵyp, qyzmet kórsetedi. Jyl basynan beri olar 7455 ret aýyl turǵyndaryna baryp, 335 736 qyzmet kórsetken.
Qazpochta bólimsheleri arqyly tanymal memlekettik qyzmetterdi kórsetýdiń pilottyq jobasy - azamattarǵa ýaqyt pen qarajatty únemdeýge múmkindik beretin yńǵailylyqqa arnalǵan taǵy bir qadam. Pilottyq joba aldymen Shyǵys Qazaqstan oblysynda eki ai boiy testileýden ótti, nátijesinde ony Qazaqstannyń barlyq aýmaǵynda qoldaný týraly sheshim qabyldandy. «Pilottyq jobany testileýde ShQO pochta bailanysy bólimshelerinde 233 qujat berilgen. Odan bólek, bizdiń jumysymyzǵa turǵyndar tarapynan jaqsy pikirler aitylyp, oń baǵalar berilgendikten, biz ony elimizdiń barlyq aýmaǵynda júrgizýdi sheshtik. Qazirgi tańda shalǵai eldi mekenderdiń turǵyndary pochta bailanysy bólimsheleri arqyly 1656 korporatsiia qyzmetin ala alady. Demek, endi bul qyzmetterdi alý úshin, olar aýdan ortalyqtaryna baryp áýre bolmaityn boldy», – dedi Ospanov.
«Biz aýyl turǵyndaryn tek pochta qyzmetimen emes, sonymen qatar ár túrli bank qyzmetterimen, árine, onyń ishinde HQKO qyzmetimen de qamtamasyz etetin bolamyz. Óitkeni aýylda kóbine pochta bailanysy bólimsheleri ǵana jumys isteidi. Memlekettik kórsetiletin qyzmetterdi pochta arqyly alý úshin, aýyl turǵyndary qujattar paketin usynýlary, qyzmet kórsetýge jazbasha túrde ótinish berýleri jáne qajet bolǵan jaǵdaida, memlekettik baj salyǵyn tóleýleri tiis. Qazpochta operatory ótinishterdi qabyldap, qujattar paketin qalyptastyrady jáne ony jaqyn jerdegi halyqqa qyzmet kórsetý ortalyǵyna jóneltedi. Onda HQKO inspektory qyzmetti resimdep, kýrer arqyly daiyn qujattardy jiberedi», – dep qosty «Qazposhta» basshysy Sáken Sársenov.
