- Májilis depýtattary, «Nur Otan» partiiasy fraktsiiasynyń músheleri Nurlan Dýlatbekov, Snejanna Imasheva jáne Iýrii Timoshenko búgin Qaraǵandy oblysy Shahan kentine bardy, dep habarlady Ult.kz tilshisi QazAqparat agenttigine silteme jasap.
Depýtattar aldymen qazandyqtyń jarylýy saldarynan qulaǵan úidi kórdi. Olardy bul jerde Shahtinsk ákimi Serjan Aimaqov kútip aldy. Qala basshysy jaǵdaidy baiandady, qalpyna keltirý jumystary, zardap shekkenderge qandai kómek kórsetilgeni jaiynda aityp berdi.
«4-14 qańtar aralyǵynda óńirlerge jumys saparyn josparladyq. Apatqa bailanysty birinshi Shahanǵa kelýdi sheshtik. Kóńil bildirý úshin, gýmanitarlyq kómek kórsetip, turǵyndardyń bastamashyl tobymen kezdesip, olardy tyńdaý úshin keldik. Endi problemalardy egjei-tegjeili saralap, sosyn áreketke kóshemiz», - dedi Májilis depýtaty Nurlan Dýlatbekov.
Iu. Timoshenko Shahtinsk ákimimen áńgimelesý barysynda, jylytý júiesin túgendeý qajettigin aitty. «Basqa úilerge de osyndai qondyrǵy qoiylǵan. Ázirge tergeý júrip jatyr, bul jerde tehnikalyq jáne adam faktory týyndady. Jabdyqtardyń qandai dárejede ekenin, qyzmetkerlerdiń daiyndyq deńgeiin tekserý qajet», - dep sanaidy depýtat.
Sodan keiin ákimdikte jergilikti belsendilermen kezdesý boldy.
«Sizdermen birigip bul apattyń aldyn alýǵa bolatyn edi. Sizderdi sailadyq, búgin bizdiń kókeikesti máselelerimizdi tyńdap, óz sailaýshylaryńyzdy qutqarý sheshimin qabyldaidy dep senemiz. Sebebi adamdar áli de osyndai úilerde turyp jatyr. Mundai qazandyqtar jeterlik», degen oiyn bildirdi jergilikti qoǵamdastyq tóraǵasy Sapar Ibkeev. - Bizge qazandyq kerek. Bul týraly surap ótingimiz kelmeidi, talap etemiz. Osy máseleni úkimettik deńgeide sheshýge járdemdesýlerińizdi suraimyz».
Kinálini izdeý aqylǵa syimaidy, - dedi belsendi. «Barlyǵymyz - kinálimiz. Qaza tapqandardyń aldynda bárimiz de jaýaptymyz. Endi aman qalǵan adamdar aldynda jaýapkershiligimizdi umytpaiyq».
Depýtattar belsendilermen jylytýǵa bailanysty sheshimderdiń balamaly nusqalaryn talqylady.
.jpeg)