- Qaraǵandy oblysynyń bilik ókilderi Shahan kentinde qulaǵan kópqabatty úidiń zardap shekken jáne qurban bolǵan turǵyndarynyń otbasylaryna materialdyq kómek kórsetedi, dep habarlaidy "Ult aqparat".
«Mert bolǵan otbasynyń árbir múshesine 1 million teńge materialdyq kómek kórsetiledi. Aýrýhanada jatqan, zardap shekkender úshin 500 myń teńgeden tólenedi»,-dedi oblys ákiminiń baspasóz qyzmetiniń jetekshisi Áliia Syzdyqova.
Ákimdik qaitys bolǵandardy jerleý men as berý shyǵyndaryn óz moiyndaryna alady. Buǵan qosa tiisti zańnamaǵa sáikes, arnaiy komissiia jumysynyń sheshimimen keltirilgen shyǵyn biýdjetten tólenedi.
Aita keteiik, 1 qańtar kúni 22 saǵat 40 minýttar shamasynda Qaraǵandy oblysynyń Tótenshe jaǵdailar departamentine Shahan kentinde kópqabatty úidiń qulaǵany jóninde arnaiy habar kelip túsken. Oqiǵa ornynan tótenshe jaǵdailar qyzmetiniń kúsh-qurylymdary men arnaiy tehnikalary jóneltilip, turǵyndardy evakýatsiialaý jumystary júrgizildi. Shahan kentiniń ákimdigi janynan 8 (72156) 3-24-17 nómiri boiynsha, jedel jeli qyzmeti uiymdastyryldy.
Qiraǵan úidiń úiindilerinen 9 adamnyń máiiti tabyldy. Olardyń 3-ýi er adam, 3-ýi áiel adam, taǵy úsheýi balalar. Resmi tizimdi Qaraǵandy oblysynyń tótenshe jaǵdailar qyzmeti usyndy. Qurban bolǵandardyń arasynda 2016 jyly týǵan eki náreste bar. 32 jasar er azamat úiindilerdiń astynan aman shyqty.
Úidiń qulaýyna 4-shi podezdiń jertólesinde ornalasqan qazandyqtyń jarylýy sebep bolǵan. Qulaǵan úi 1987 jyly salynǵan. Apat bolǵan podezde 10 páter bolǵan. Ákimdiktiń málimetteri boiynsha, úide 118 adam turyp jatqan. Qulaǵan podezde 25 turǵyn, qonaqtardy qosa alǵanda shamamen 30 adam bolǵan.
Shahandyqtar ortalyqtandyrylǵan jylý júiesi bolmaǵandyqtan jylý máselesin ózderi sheshken. Bilik ókilderiniń málimetterinshe, jańa qazandyq salý jospary 2013 jylǵa qoiylǵan. Joba-smetalyq qujattar daiyndalǵanymen qarjy máselesi qolbailaý bolyp kelgen. Qaiǵyly jaǵdaiǵa bailanysty Elbasy Nursultan Nazarbaev kóńil aitty. Memleket basshysy Qaraǵandy oblysynyń ákimi men ózge de quzyrly organ ókilderine zardap shekken turǵyndarǵa jan-jaqty kómek kórsetip, oqiǵanyń sebep-saldaryn anyqtaýdy tapsyrdy.
.jpeg)