Keshe oblys ákimi Danial AHMETOV qala kúni merekesi qarsańynda Óskemendegi demalys oryndary men saiabaqtarda bolyp, ondaǵy júrgizilip jatqan qurylys, jóndeý jumystarynyń barysymen tanysty.
Esterińizge salaiyq, keler aptada oblys ortalyǵy óziniń 296 jyldyq mereitoiyn atap ótpek. Osyǵan bailanysty, qazir shaharda kóptegen demalys orny qalpyna keltirilýde, jańa saiabaqtar salynyp, mańyzdy áleýmettik nysandardyń qurylysy aiaqtalýda. Sondai jańa nysannyń biri ári biregeii dep «Nurly jol» saiabaǵyn aitýǵa bolady. Oblystyq drama teatrynyń janynan salynyp jatqan demalys ornynyń jalpy aýmaǵy bes gektardy quramaq. Saiabaqtyń aýmaǵy ádettegidei tórt tekshe emes, romb tárizdes bolady dep josparlanýda. Al nysannyń týra ortalyǵynda biiktigi 22 metrlik «Nurly jol» monýmenti ornatylmaq. Atalmysh monýment kók bairaǵymyzdyń túsine boialǵan kolonnalardan, sonymen qatar, shańyraq pen aspanda qalyqtaǵan búrkit músininen quralmaq.
Biregei demalys ornynyń qurylysyn óz moinyna alǵan merdiger kompaniia almatylyq «Level-S-8» seriktestiginiń direktory Sársen Seiitovtiń aitýynsha, qazir saiabaqtyń aýmaǵyn abattandyrý jumystary júrgizilýde. Bolashaqta munda demalys zonalary, balalardyń oiyn alańqailary men sporttyq alańdar paida bolyp, LED shamdar ornatylmaq. Buǵan qosa, 500-den astam kóshet otyrǵyzylady dep kútilýde.
Qurylys jumystarynyń barysymen tanysqan oblys ákimi Danial AHMETOV merdiger kompaniia men quzyrly mekemeler basshylaryna birqatar tapsyrma berdi. Atap aitqanda, munda otyrǵyzylatyn taldardyń biiktigi bastapqy jospardaǵydai bir jarym metr emes, kem degende úsh jarym, áitpese bes metrdi quraý kerektigin eskertti.
– Keler jyldyń jazynan keshiktirmei atalmysh saiabaqtyń qurylysyn aiaqtap, qoldanysqa berýimiz kerek. Baiqasańyzdar, sońǵy birneshe jylda qalanyń osy bir aimaǵynda qurylys jumystary kúsheidi. Bul durys, sebebi, biz Jibek matalar kombinaty yqshamaýdany men Ertistiń oń jaǵalaýy arasyndaǵy bos jatqan jerlerdi tiimdi paidalanýymyz kerek. Mine, jańadan salynǵan oblystyq teatrdyń irgesinde bolashaqta osyndai tamasha saiabaq paida bolady. Al 2017 jyly saiabaq pen teatrdyń qasynan toǵyz qabatty on turǵyn úidiń qurylysy bastalady. Ainaldyrǵan birneshe jyldyń ishinde bul aimaq adam tanymastai ózgeredi, – dedi oblys ákimi.
Aimaq basshysynyń aitýynsha, bolashaqta qaladaǵy burynǵy Komendantka ózeniniń aýmaǵy da aitarlyqtai ózgeriske ushyraityn bolady. Qurylysshylar bul jerde shetelde óte tanymal deking (jerge aǵash taqtailar salý) ádisin qoldanbaq. Bolashaqta demalys ornynda jańa shamdar ornatylyp, ashyq alańqailarǵa gazon tóseledi. «Bastaý» atty jasandy sarqyrama men shaǵyn sý qoimalar paida bolady. Sonymen qatar, «Street workout» tárizdes sporttyq alańqailar salynyp, trenajerler ornatylmaq.
Bolashaqta qalalyqtardyń taǵy bir súiikti demalys ornyna ainalatyn saiabaqtyń qurylysy eki jyldyń ishinde aiaqtalady dep josparlanyp otyr. Oblys ákimi Danial AHMETOV Komendantkany kórkeitý isine jaýapty «Esil-Energoservis» JShS-niń basshylyǵyna jumystaryna joǵary baǵa bere kelip, nysan ýaqytynan keshiktirilmei qoldanysqa berilýi kerektigin taǵy bir márte eske saldy.
Qalany aralaý barysynda aimaq basshysy Uly Otan soǵysynda qurban bolǵan sarbazdarǵa arnalǵan Dańq memorialynyń ainalasynda júrgizilip jatqan qurylys jumystarymen tanysty. Qazir Ertis pen Úlbi ózenderi toǵysqan tusta oryn tepken memorialdy qalpyna keltirý jumystary qyzý júrgizilýde. Aimaq basshysynyń tapsyrmasy boiynsha munda túsi múldem ózgeshe trotýar tóselip, jaǵalaý qorshaýlary granit plitkalarmen qaptalmaq. Sondai-aq, biiktigi tórt metrdi quraityn shoiyn tireýishter oryn teppek. Bul jumystyń barlyǵy biylǵy kúzden qalmai aiaqtalýy tiis.
Aimaq basshysy, sonymen qatar, Boris Aleksandrov atyndaǵy sport saraiynda bolyp, mundaǵy qurylys jumystarynyń barysyn kórip qaitty. Búginde sport saraiynyń foielerin 18,5 metrge úlkeitý jumystary aiaqtalýǵa jaqyn. Bolashaqta munda saýda núkteleri, demalys oryndary, qosymsha dárethanalar men pandýstar paida bolady. Merdigerler atalmysh jumystar qyrkúiek aiynyń sońyna deiin aiaqtalatynyna sendirip otyr. Al keler jyldan bastap sport saraiynyń syiymdylyǵyn ulǵaitý jumystary qolǵa alynady dep kútilýde. Osynyń arqasynda búginde 4 400 orynǵa shaqtalǵan arena bes jarym myń adamdy qabyldai alatyn bolmaq.
– Óskemen – qazaq hokkeiiniń otany. Munda bul sportty jaqsy kórmeitin adam kemde-kem. Sport saraiyna «Torpedonyń» oiyndaryna kelgen saiyn arena jankúierge lyq tolatynyn kórip júrmin. Osy sebepti oblys ortalyǵynda syiymdylyǵy kem degende bes jarym myńdyq hokkei arenasy bolýy kerek dep túidim. Mine, aldaǵy birneshe jylda osy baǵyttaǵy jumystar aiaqtalyp, keńeigen, jańarǵan Sport saraiy jankúierlerdi qabyldaýǵa daiyn bolady, – dedi oblys ákimi Danial AHMETOV.
Aimaq basshysy, bul kúni sonymen qatar, Kúlenov kentiniń Moldaǵulova kóshesi boiyndaǵy abattandyrý, kórkeitý jumystarynyń barysymen tanysty. Qazir munda trotýar tóselip, balalardyń oiyn alańqailary salynýda. Sondai-aq, oblys ákimi múmkindigi shekteýli balalarǵa arnalǵan «Aqniet» mektep-internatynyń qurylys jumystarymen tanysty. Atalmysh nysanda keleshekte estý, sóileý, kórý qabileti nashar júzge jýyq bala emdelip, bilim alatyn bolady. Mektep-internat jańa jylǵa deiin paidalanýǵa berilýi tiis.
Nurjan Kenjeuly
