Endi shaǵyn kásipkerlik sýbektilerine jatatyn zańdy tulǵalar, filialdar men ókildikterdi eseptik tirkeý úshin Elektrondy úkimet veb-portalynda habarlama toltyrý ǵana qajet, dep habarlaidy QazAqparat.
«Azamattarǵa arnalǵan úkimet» memlekettik korporatsiiasy Almaty qalasy filialynyń direktory Abdýrasýl Kýldashovtyń aitýynsha, JShS ashý úshin jańa is bastaǵan kásipkerge jarǵy qajet emes, tirkeý jarnasyn tóleýdiń nemese salyq organyna barýdyń da qajeti joq.
«Tek kompiýter men Elektrondyq tsifrlyq qoltańbasy bolsa jetkilikti. Egov.kz saitynda JShS tirkeý nusqaýlaryn oryndasa, jarty saǵatqa jetpei nátijesi shyǵady», - dedi ol.
Sondai-aq spiker eger bári durys bolsa, júie aqparatty óńdep, JShS-nyń tirkelgendigi jaily anyqtamany 30 minýtta (maksimým) beretinin, eger portal jaqsy jumys istese, anyqtama 10 minýtta daiyn bolatynyn atap ótti.
«Osylaisha memlekettik kórsetiletin qyzmet nátijesi egov.kz portalyndaǵy jeke kabinette árdaiym qoljetimdi jáne tirkelgenin rastaityn qujattardy alý úshin Memlekettik korporatsiiaǵa júginýdiń qajeti joq», - dedi ol.
«Azamattarǵa arnalǵan úkimet» memlekettik korporatsiiasy» KEAQ Almaty qalasy boiynsha filialynyń málimetinshe, jyl basynan beri Almaty qalasy boiynsha tirkelgen 4390 zańdy tulǵanyń 4232-i onlain tirkelgen. Tek 158-i HQKO-larǵa kelip ótinish bergen. Al, qaita tirkeýge ótinish bergen 3061 zańdy tulǵanyń 2907-i onlain, 154-i HQKO arqyly ótinish bergen.
Aita keteiik, memlekettik qyzmetterdiń 96%-yn HQKO-ǵa kelmei-aq, eGov mobildik qosymshasy, Egovkzbot2.0 Telegram-bot jáne Egov.kz. elektrondyq úkimet portaly arqyly aýlǵa bolady.
