Sáken Seifýllin bastaǵan «bolshevikterdi» búgingi tańda Alash Ordaǵa qarsy qoiyp, qaralaý durys emes, olar da qazaq halqyna qyzmet etti. Olardy da 1937-38 jyldary sottady, atty, deidi Sh.Ýalihanov atyndaǵy Tarih jáne etnologiia institýtynyń direktory Ziiabek Qabyldinov búgin QR Prezident arhivinde HH ǵasyr basyndaǵy tarihi tulǵalarǵa qatysty ótken jiynda, dep habarlaidy QazAqparat tilshisi.
Búgin Almatydaǵy QR Prezident arhivinde «1917 jyl. Qazaqstandaǵy Keńes biliginiń bastalýy. Tarihi tulǵalar» taqyrybynda tarihshy ǵalymdar men ziialy qaýymnyń basyn qosqan jiyn ótti. Elbasy N.Nazarbaev «Rýhani jańǵyrý: Bolashaqqa baǵdar» maqalasynda: «Biyl Eýraziia qurlyǵynyń ulan-ǵaiyr aýmaǵyn astań-kesteń etken 1917 jylǵy qazan aiyndaǵy oqiǵaǵa 100 jyl toldy. Kúlli HH ǵasyr revoliýtsiialyq silkinisterge toly boldy. Bul osy aýmaqtaǵy barsha ulttarǵa meiilinshe áser etip, búkil bolmysyn ózgertti. Árbir jurt tarihtan ózinshe taǵlym aldy», dep jazdy. Osy másele tóńireginde uiymdastyrylǵan búgingi dóńgelek ústelde tarihshy ǵalymdar Qazaqstanǵa qazan tóńkerisiniń yqpaly, qazirgi zamanǵy kózqaras, bolshevikter biligine qazaq ziialylarynyń aralasýyn zerdeleý arqyly HH ǵasyr basyndaǵy dúrbeleńdi saralaý máselelerin talqylady. Jiynda baiandama jasaǵan Sh.Ýalihanov atyndaǵy Tarih jáne etnologiia institýtynyń direktory, tarih ǵylymdarynyń doktory Ziiabek Qabyldinov Sáken Seifýllin bastaǵan bolshevikterdiń qazaq halqy úshin jasaǵan eńbegin joqqa shyǵaryp, Alash ordaǵa qarsy qoiyp, qaralaý durys emes ekenin aitty.
«1921-22 jyldary Aqmola oblysynda surapyl asharshylyq boldy, sonda 474 myń qazaq ash qaldy. Sáken Seifýllin osy qazaqtardy ashtyqtan aman alyp qaldy. Qazaqtyń ziialy uldary qai partiianyń quramynda bolsa da Otanyna, eline qyzmet qylǵan. Sáken Seifýllin Qazaq KSR Halyq Komissarlary Keńesiniń tóraǵasy bolyp turǵanynda qazaq halqyna jemisti qyzmet etti. Sondyqtan, Alash ziialylary men bolshevikterge qyzmet etken azamattardy qarama-qarsy qoiý durys emes. Óitkeni, S. Seifýllin osy jyldary Alashtyń myqty azamattaryn qyzmetke tartady. Onyń ishinde, A.Baitursynov, Birimjanov, S.Sadýaqasuly, T.Teljanov syndy Alash partiiasynyń azamattary boldy. Eger ol halqyn oilamasa, ondai qadamdar jasamas edi. Sáken Seifýllin úlken qyzmette júrgeninde densaýlyq salasy, dene shynyqtyrý, sport, mádeniet, ǵylym salalaryna kóp eńbek sińiredi. Mysaly, Patshaly Resei kezinde bizderdi «kirgiz-kaisak» dep keldi ǵoi, Seifýllin sol qazaq atymyzdy qaitarýǵa kóp úles qosqan. Sáken Seifýllin memlekettik tilge kóp kóńil bólgen. Men muraǵat materialdarynan Seifýllinniń tilge qatysty mynadai sózderin jazyp aldym. «Is qaǵazdary ainalymyna qazaq tilin endirý óte qiyn jumys. Ony júzege asyrý úshin bizge qaitpas qaisarlyq qajet. Alda, gýberniialardyń otyrysynda osy másele boiynsha esepterin tyńdaityn bolamyz», dep jazǵan. Sol kezde ol Qazaqstannyń birinshi basshysy retinde memlekettik tilge osyndai janashyrlyq qylǵan. Qazir Elbasymyz «Bolashaq» stipendiiasymen jastardy oqytyp jatyr. Sáken Seifýllin de osy «Bolashaqtyń» bastamasyn jasaǵan. Sáken Seifýllin Reseidiń Eýropa bóligindegi aitýly oqý oryndarynda qazaq jastaryn oqytýǵa 1 140 oqý grantyn alǵan. 1834 jyldardan bastap, qazaq jastary áskerge alynbaityn. Sáken Seifýllin ofitser bolam degen qazaq jastaryn Qazandaǵy áskeri oqý ornyna barýǵa ruqsat alyp bergen. Shahmat oiyndaryn nasihattaǵan, Zataevichtiń «Qazaqtyń 1000 ánin» shyǵarýǵa da járdem etken. Sáken Seifýllin din máselesine de kóńil bólgen. El basqaryp turǵanynda basshylarǵa «Oraza, Ait kezinde múmkindikke qarap, demalys berý qajet» dep aitqany bar. Latyn árpine qatysty Sáken Seifýllin 1929 jyly «Latyn árpiniń tiimdiligin ómir kórsetip otyr» dep jazǵan», - dedi tarihshy Ziiabek Qabyldinov.
Búgingi jiynda S.Seifýllinmen qatar, Turar Rysqulov, Seiitqali Meńdeshev syndy tulǵalardyń ómir joly, qyzmetine arnalǵan baiandamalar jasalyp, tarihi qujattar kórsetildi.
.jpg)