Sońǵy úsh jylda «Serpin-2050» baǵdarlamasymen bólingen 11 296 granttyń 5516-syn iaǵni 50 paiyzyn Ońtústik Qazaqstan oblysynyń jastary iemdengen. Desek te jobaǵa qatysýǵa nietti jastardyń sany jyldan-jylǵa artyp keledi. Osyǵan bailanysty jobaǵa bólinetin grant sanyn keminde 5 myńǵa kóbeitý kózdelip otyr. Búgin bul týraly oblys ákimi J. Túimebaevtyń tóraǵalyǵymen ótken selektorlyq otyrysta oblystyq jastar saiasaty máseleleri basqarmasynyń basshysy Balmarjan Narbekova málim etti, dep jazady "Ult aqparat" OQO ákiminiń baspasóz qyzmetine silteme jasap.
Elimizde jastardyń sapaly bilim alýyna mol múmkindik berip otyrǵan «Serpin-2050» jobasy Elbasymyz Nursultan Ábishulynyń tapsyrmasymen 2014 jyldan beri júzege asyrylyp keledi. Atalǵan jobanyń maqsaty - jastardy halqy az qonystanǵan jáne eńbek kúshin qajet etetin soltústik aimaqtardaǵy joǵary jáne kásiptik-tehnikalyq oqý oryndaryna ornalastyrý jáne jumyspen qamtý. Jalpy jobaǵa 14 oblys qatyssa, onyń ishinde 9-y qabyldaýshy, al, 5-ýi jiberýshi óńir.
«Jobaǵa elimizdegi 133 joǵary oqý oryndarynyń arasynan 25 joǵary oqý oryndarynda pedagogikalyq 15 mamandyq, tehnikalyq 14, aýylsharýashylyǵy 9, veterinariia 2 mamandyq boiynsha talapkerler qabyldaýda. Mamandyqtardyń jalpy sany 40-qa jýyqtaidy. Jobaǵa qatysýshy árbir talapkerlerge barlyq áleýmettik jeńildikter qarastyrylyp, stýdentter úshin barlyq materialdyq-tehnikalyq bazamen tolyqtai jabdyqtalǵan», - dedi Balmarjan Polatqyzy.
Atalǵan joba aiasynda oblysymyzdaǵy «Jastar resýrstyq ortalyqtary» aýyldyq jerlerdegi 800-ge jýyq jalpy bilim beretin mektepterdegi bitirýshi túlektermen kezdesýler uiymdastyrylǵan. Nátijesinde pedagogikalyq mamandyqtar boiynsha 12 joǵary oqý orynyna, tehnikalyq, aýylsharýashylyǵy jáne veterinariia mamandyqtary boiynsha 22 joǵary oqý oryndaryna 8 myńǵa jýyq talapkerlerden qujattar qabyldanyp, ulttyq testileý ortalyǵyna joldanǵan.
«Elimizdegi «Serpin-2050» jobasy tegin bilim alýǵa úlken múmkindik beredi. Bul baǵdarlamanyń saiasi mańyzdylyǵyn aýdan, qala basshylary jaqsy túsinip, úgit-nasihat jumystaryn jandandyrýy qajet. «Serpin -2050» jobasy men halyqty soltústikke óz erkimen kóshirý baǵdarlamasyn biriktirý máselesin oilastyrǵan jón. Ol úshin monitoring jumystaryn jandandyryp, naqty usynystar ázirlensin», - dedi Janseiit Qanseiituly.
Jiyndy qorytyndylyǵan óńir basshysy ońtústikten soltústikke kóship barǵan otbasylardyń balalaryn da «Serpin» jobasymen bilim alýyna yqpal etip, jumyspen qamtý máselesin nazarǵa alýdy tapsyrdy.
