Mańǵystaý oblysynyń ákimi Serikbai Trumov qoǵamda qyzý talqylanyp jatqan Bozjyra mańynda vizit-ortalyq salýǵa bailanysty pikir bildirdi, dep habarlaidy "Ult aqparat".
"Qadirli jerlester!
Eldiń damýynda keleli máseleler ár ýaqytta da bolǵan jáne bola beredi.
Másele kóterilgen kezde El azamattary bas kóterip, halyqqa jol siltep, bilikke ziialy qaýymnyń ustanymyn jetkizedi, buǵan tarih kýá. Bizdiń ólkede de el azamattarynyń pikiri basty nazarda.
Men úshin týǵan jerimniń ár tasy qymbat. Men de óńir perzenti retinde kórkem tabiǵatymyzdyń buzylmai saqtalýyn qalaimyn.
Sonymen qatar óńir basshysy bolǵandyqtan, halyqqa jumys taýyp berý, el ekonomikasyn kóterý - meniń basty paryzym.
Sizder týǵan dalamyzdyń bir bólshegin maqsaty bólek bóten bireýge qiyp bere salady eken dep oilamańyzdar. Barlyǵy da zań aiasynda iske asyrylady. Sonymen birge atqarýshy organ óz tarapynan investorǵa tabiǵatty qorǵaý, jergilikti kásipkerlikti qoldaý, halyqtyq qundylyqtarymyzdy saqtaý, týrizmdi álemdik órkenietpen, adami, mádeni normalardy saqtai otyryp júrgizý boiynsha naqty talaptar qoiylyp, qatań qadaǵalanatyn bolady.
Munai qory da bir kúnderi taýsylady. Qazir bizge týrizmdi damytý arqyly tabysqa qol jetkizý paidaly bolyp otyr. Oǵan tabiǵi múmkindigimiz de, teńizimiz de, kórikti jerlerimiz de bar.
Óńirge qyrýar investitsiianyń kelýiniń arqasynda týrizm, soǵan qosa shaǵyn jáne orta biznestiń (qolóner, ulttyq taǵam, aýyl sharýashylyǵy, t.b.) qanat jaiýyna, infraqurylymdardyń damýyna, jol qurylysynyń órkendeýine, jolaýshylar tasymalynyń zamanaýi deńgeige kóterilýine, jastardy turaqty jumyspen qamtýǵa qol jetkizemiz.
Qazirgi tańda bir Riksostiń ózinde 700-dei jańa jumys ony qurylyp, jerlesterimiz qyzmet etýde, tiisti salyq óńir qazynasyna turaqty túsip otyr. Endi, shyn máninde, ishki týrizmniń áleýeti kúsheiýi naqty kórinis tabýda.
Biz budan utpasaq, utylmaimyz. Investor aqsha salamyz dep, ózi kelip tursa, nege odan bas tartamyz?! Mundai múmkindik kúnde bola bermeidi. Sondyqtan, Bozjyradaǵy jobany iske asyrýymyz kerek! Ol el bolashaǵy úshin kerek!
Jobaǵa bailanysty pikirler ekige jarylyp, jeke basqa tiisý, el azamattarynyń abyroiyna aýyr sózder aitylyp jatqanyn da baiqap otyrmyn. Pikir alýandyǵy qoǵamdy damytady, alǵa súireidi. Biraq ár azamattyń tańdaýy men jeke ustanymyn qurmetteý mádenieti eskerilýi tiis" - dedi aimaq basshysy.
