Foto: ashyq derekkóz
Astanada 2026 jyldan bastap kúshine enetin jańa Salyq kodeksin túsindirý boiynsha respýblikalyq seminarlar seriiasy aiaqtaldy. Qorytyndy is-sharaǵa Premer-ministrdiń orynbasary – ulttyq ekonomika ministri Serik Jumanǵarin, qarjy ministri Mádi Takiev, sondai-aq Memlekettik kirister komiteti men «Atameken» kásipkerler palatasynyń ókilderi qatysty, dep habarlaidy Ult.kz.
Óz sózinde Serik Jumanǵarin biznes úshin mańyzdy máselelerdiń biri - arnaiy salyq rejimderin qoldaný týraly egjei-tegjeili toqtaldy.
«Mundaǵy basty qaǵida: buǵan deiin kim ońailatylǵan salyq rejiminde jumys istep kelgen bolsa, sol rejimde qalady», — dedi vitse-premer.
Sonymen qatar óńdeý ónerkásibi úshin erekshe erejeler engizilýde. Vitse-premer túpki tutynýshymen tikelei jumys isteitin kásiporyndarǵa ońailatylǵan salyq rejimin qoldanýǵa ruqsat etiletinin aitty.
«Óńdeý ónerkásibiniń bir bóligine ruqsat beremiz. Eń aldymen, ol kásiporyn ofsette nemese iri kásiporyndar úshin jetkizýshi bolyp sanalmaityn B2C sektoryna baǵyttalǵan bolýy tiis», — dep atap ótti Serik Jumanǵarin.
Atalǵan sektordyń qalǵan bóligi úshin jalpyǵa birdei belgilengen salyq salý tártibin qoldaný kózdelgen. Bul tásil mundai kásiporyndar úshin qoldanystaǵy salyqtyq yntalandyrý sharalarynyń bar ekenimen bailanysty, sonyń ishinde olarǵa óndiristik maqsattaǵy import taýarlar boiynsha QQS esepteledi jáne jańǵyrtý jumystary kezinde salyq alynbaidy. Salany memlekettik qarjylyq qoldaýdyń aýqymdy sharalaryn júzege asyrý da negizgi faktor bolyp sanalady.
«Biz damý institýttary boiynsha aýqymdy baǵdarlamany bastadyq. "Báiterekti" kapitaldandyrý biyl 1 trln teńgege jýyqtady, al úsh jyldyq biýdjetke jyl saiyn 1 trln teńgeden salyp otyrmyz. Bizdiń bizneske, sonyń ishinde negizinen óńdeý ónerkásibine jasap otyrǵan qoldaý sharalarymyz qomaqty qarjyny talap etedi. Sol sebepti jalpy alǵanda óńdeý salasy qoldaýdan shet qalmaidy deýge bolady», — dep qorytyndylady Serik Jumanǵarin.
