Shýchinsk qalasynda TMD-ǵa múshe memleketter Dene shynyqtyrý jáne sport salasyndaǵy kelisim qatysýshylarynyń Dene shynyqtyrý jáne sport jónindegi keńesiniń otyrysy ótti, dep habarlaidy "Ult aqparat".
Keńes otyrysyna TMD memleketteri (Qazaqstan, Ázerbaijan, Armeniia, Belarýs, Qyrǵyzstan, Resei, Tájikstan, Túrikmenstan, Ózbekstan) sport jáne dene shynyqtyrý salasyndaǵy quzyretti organdarynyń basshylary, sonymen qatar TMD Atqarýshy komiteti, QR Mádeniet jáne sport ministrligine qarasty vedomstvolyq baǵynystaǵy uiymdar men oblystyq dene shynyqtyrý jáne sport basqarmalarynyń ókilderi qatysty.
Shara aldynda Serik Sápiev 2019-2020 jyldar boiynsha Táýelsiz memleketter dostastyǵy elderi ókilderiniń Sport jáne dene shynyqtyrý keńesiniń tóraǵasy bolyp sailandy. Óz sózinde Serik Sápiev keńes múshelerine ózine artqan senimi úshin alǵys bildirip, birlesken jumysty ári qarai jalǵastyrý qajettigin aitty.
«Qazaqstannyń sport jáne dene shynyqtyrý salasyndaǵy memlekettik saiasat buqaralyq jáne joǵary jetistikter sportyn qatar damytýǵa negizdelgen. Halyqty turaqty túrde sportpen ainalysýǵa tartý mańyzdy bolyp sanalady. QR Mádeniet jáne sport ministrligi memlekettik tapsyrmany oryndaý aiasynda jasalǵan jumystardyń nátijesinde sport jáne dene shynyqtyrýmen turaqty túrde ainalysatyn adamdar sany 29,8 paiyzdy qurady», - dedi Serik Sápiev.
Otyrys barysynda keńes músheleri óz elderinde atqarylyp jatqan jumystar týraly málimet berdi. Sonymen qatar Qazaqstan Respýblikasy men TMD elderinde atalmysh salada júzege asyrylatyn memlekettik saiasat máseleleri qarastyryldy. Elimizdiń sport salasyna tsifrlyq tehnologiialardy engizý men 2021-2030 jyldarǵa arnalǵan TMD qatysýshylarynyń Sport jáne dene shynyqtyrý salasyndaǵy strategiia jobasy talqylandy.
Kezdesý sońynda TMD qatysýshy memleketteriniń sport jáne dene shynyqtyrý boiynsha qabyldanǵan sheshimderiniń hattamasyna qol qoiyldy.
Sport jáne dene shynyqtyrý boiynsha keńes TMD memleketterinde jyl saiyn ótip turady. 2018 jyly shara Armeniiada ótken bolatyn. Kelesi keńes 2020 jyly TMD memleketteriniń alǵashqy oiyndarynyń aiasynda Tatarstan astanasy Qazanda uiymdastyrylady.
