1 jeltoqsannan bastap elimizdiń barlyq kinoteatrynda boksshy Serik Sápievtiń shynaiy oqiǵasyna negizdelgen filmi prokatqa shyǵady, dep habarlaidy QazAqparat.
Rejisser Aqan Sataevtyń jańa filmi Olimpiada chempiony, boksshy Serik Sápievtiń ómirbaiany jelisinde túsirildi. Týyndyda Seriktiń bokstaǵy alǵashqy qadamdarynan bastap, mansabyndaǵy basty maqsaty – Olimpiada altynyna qol jetkizý joly baiandalady.
Oqiǵa suhbat formatynda berilgen, onda Serik ómiriniń erekshe kezeńderin eske alyp, sporttaǵy joly qalai bastalǵany, jeńilisteri, jeńisteri jáne armanynyń oryndalǵany týraly áńgimeleidi. Sondai-aq filmde mahabbat pen dostyq kórinisteri de bar.
Filmniń stsenariin jazýǵa Aqan Sataevtyń ózinen bólek eki adam qatysty. Ádebi stsenaridi jazýǵa Timýr Jaqsylyqov pen Almira Tursyn atsalysty. Serik Sápiev keńesshi boldy.
Basty róldi jas akter-debiýtant Smadiiar Sabyrov somdady.
«Biz filmdi uzaq ýaqyt túsirdik - eki jyldan astam ýaqyt jumys istedik. Daiyndyq kezeńi men kastingke úlken jaýapkershilikpen qaradyq. Biz basty keiipkerimizdi uzaq ýaqyt izdedik. Qudaiǵa shúkir, ony taptyq. Bul sporttyq drama, Olimpiada chempiony týraly oqiǵa, sondyqtan keiipker ekranda senimdi kórinýi úshin tek akter ǵana emes, boksshy da bolýy kerek edi. Smadiiarmen, jattyqtyrýshylarmen, keńesshilermen daiyndyq jumystary júrgizildi. Esterińizde bolsa, Serik Sápiev solaqai, al Smadiiar ońaqai. Ol qaita jattyǵýǵa májbúr boldy. Meniń oiymsha, bul akter úshin qyzyqty ári úlken tájirbie. Men búgingi nátijege óte qýanyshtymyn. Smadiiarǵa osy eńbegi úshin, atqarǵan eńbegi úshin taǵy da alǵys aitqym keledi», – deidi Aqan Sataev.
Sonymen qatar, ol Serik Sápievke film unaǵanyn tilge tiek etti.
«Bastapqyda biz Seriktiń ózin túsireiik degenbiz, biraq keiin munyń bárin akter oinaýy kerek degen qorytyndyǵa keldik. Onyń ústine, onyń jumys kestesi tyǵyz boldy», - dep túsindirdi rejisser.
