Qazaqstandyq boksshy Serik Sapiev marqum Denis Tenniń otbasy men jaqyndaryna qaiǵyryp kóńil aitty, dep habarlaidy QazAqparat tilshisi.
«Qazaqstandyq sportshylar atynan qazaǵa qaiǵyryp kóńil aitamyz. Denis bizdiń júregimizde məńgi saqtalady. Osydan biraz jyl buryn «Denis jəne onyń dostary» shoýyn ótkizgenimiz esimde. Osy sharany men júrgizgen bolatynmyn. Denispen sol kezde jaqyn tanystym. Sonda onyń shynaiy, meiirimdi, intellegentti, rýhy myqty adam ekenin baiqadym», - dedi Serik Sapiev búgin Almatyda.
Qazaqstandyq mənerlep syrǵanaýshy, Olimpiada oiyndarynyń júldegeri Denis Tendi aqtyq saparǵa shyǵaryp salý rəsimi ótti.
Saǵat 11.20-da onyń denesin Balýan Sholaq atyndaǵy sport saraiynan alyp shyqty. Sportshyny «Drýjba» aýylynda jerleidi.
Eske sala ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
