Elimizdiń burynǵy premer-ministri Serik Ahmetov biyl 21 qyrkúiek kúni túrmeden bosatylatyn boldy. Onyń túrmege qamaý jazasy bostandyǵyn shekteý jazasyna almastyrylmaq, dep jazady Today.kz senimdi derekkózderine silteme jasap.
Aqparattyq agenttiktiń habarlaýynsha, Ahmetov 4 jyl 26 kún jazasyn óz úiinde ótkizedi. Vitse-premer Qaraǵandy qalasyndaǵy úiinde tirkelgen. Túrmeden shyqqannan keiin de dál osy úiinde ómir súrýi tiis.
"21 qyrkúiekte sheshim zańdy kúshine enedi. Munan keiin ol qamaýdan bosaidy. Nege deisizder me? Serik Ahmetov AK 159/18 túrmesinde ózin tek jaqsy qyrynan ǵana kórsete bildi. Memleketke keltirilgen shyǵyndy da tolyqtai ótedi", - deidi portaldyń senimdi derekkózi.
Ahmetov túrmede 4 ret gramota alyp, úlgili tártibi úshin marapattalǵan.
Eske salaiyq, Serik Ahmetov 2015 jyldyń jeltoqsan aiynda 10 jylǵa bas bostandyǵynan airylyp, dúnie-múlki tárkilendi. Oǵan memlekettiń qarajatyn talan-tarajǵa saldy, kásipkerlikpen zańsyz ainalysty, qyzmetin asyra paidalandy degen aiyptar taǵylǵan bolatyn. 2016 jyldyń naýryzynda Qaraǵandy oblystyq sotynyń apelliatsiialyq alqasy eks-premerdiń jazasyn 8 jylǵa deiin qysqartty.
