««Baian Sulý» serialy - senimsiz, jasandy, halyqqa kórsetetindei deńgeide emes».
Qazaqtyń kórnekti satira sardary, Qazaqstannyń eńbek sińirgen qairatkeri Kópen Ámirbek Ulttyq arnadan kórsetilip, úlken daýǵa ainalǵan "Qozy Kórpesh - Baian Sulý" serialyna qatysty óz pikirin osylai jetkizdi, - dep habarlaidy "Qazaq úni" ulttyq portalynyń tilshisi.
- Bizdiń qazaq kinosy tarihynda dál osy "Baian Sulý" serialyndai daý-damai týǵyzǵan serial bolǵan joq. Nege? Bul janjal qaidan shyqty? Negizgi synshy halyq emes pe? Halyq - elek. Ónerdi - bir qap un dep qaraityn bolsaq, unyńdy ilegende keregi bir jaqta, kebegi bir jaqta qalmai ma? Osy serialdy elekten ótkizsek, bunyń keregi shamaly, kebegi kóp dúnie. Sondyqtan da, kópshilik kóńilinen shyqpaǵannan keiin narazy.
"Halyq uiǵarsa, han túiesin soiady" degen ataly sóz bar. Osy serialdyń ainalasynda ter tókpese de, eńbektengenderge, olardyń shashbaýyn kótergenderge aitarym - shyn ónerdi qorlaýǵa bolmaidy!
Qazaq halqy baǵzydan beri óziniń salt-sanasyn, ádet-ǵurpyn saqtap kelý arqyly qazaq bolyp kele jatqan joq pa? Serialdy túsirýshiler ádebietimizdiń altyn qoryna ainalǵan uly dastanymyzdy alyp shyǵa almaǵan. Jibektei dúniemizdi julmalap jún-jyrǵasyn shyǵarǵan. Árqaisysynyń róline jeke-jeke toqtalýǵa bolar edi, ony artyq sanap otyrmyn. Sebebi, jalpy alǵanda serial jasandy, senimsiz, halyqqa kórsetetindei deńgeide emes.
Al, endi bireýler shyǵyp "oibai, ol jyrdyń bálenbai nusqasy bar" dep jatyr. Meili, qansha nusqasy bolsa da, halyqtyń júreginde, kókireginde "Qozy-Kórpesh - Baian-Sulý" jyry sholpan juldyzdai bir ǵana nusqada jarqyrap tur. Bular sony jarqyrata almady. Onyń nesin qorǵaidy? Ómirde eki nárse bar: biri - qorǵaý, ekinshisi - qorlaý. Jarty ǵasyr buryn túsirilgen "Taqiialy perishte" men "Qyz Jibekti" qarańyzshy. Qandai kórkem dúnie! Al, Baian Esentaevanyń myna serialyn óziniń jaqtastary men jaqyndarynan basqa jaqtap, qolpashtap otyrǵan adamdy kórmedim.
Biz prodiýserdiń múddesin emes, eldiń, kózi ashyq kórermenniń múddesin oilaýymyz kerek. Eldiń múddesi - memlekettiń múddesi. Memleket múddesi men Menmendik múdde degen ekeýi eki túrli. Bizdi qurtatyn osy menmendik múdde. Atym shyqqan dep, osylai jasaýǵa bola ma?
El aýzynda mynandai áfsana bar: "Qotyr eshki aitqan eken: "Meni kim soisa da, qasapshy soisa eken" degen. Bular qazaq kinosynyń qasapshysy da bola almady.
Qazaqta "tushymdy" degen uǵym bar. Shegen qudyqtyń sýynan artyq sý joq. Al, qazir "Koka-kola" sekildi ber jaǵy jyltyrap turǵan, ar jaǵy meiirińdi qandyrmaityn qur tátti sý kóp. Onymen halyqtyń meiirin qandyra almaisyń. Bular sol "Koka-kola" sekildiler ǵoi.
Uqsas jazba: Baiannyń əkesi qyzyn cynaǵandarǵa jaýap berdi
.jpg)