Elordada úshinshi jolaqqa shyǵyp alatyn júk kólikteriniń júrgizýshilerine ákimshilik aiyppul salynady, dep habarlaidy "Ult aqparat" qalalyq Politsiia departamentiniń Facebook-tegi paraqshasyna silteme jasap.
Nur-Sultan qalasy Jergilikti politsiiasynyń Ákimshilik politsiia basqarmasynyń eskertýinshe, «Sergek» sertifikattalǵan quraly kólik júrgizýshileriniń jol belgileri elemei, erejeni buzǵanyn anyqtaidy.
«Jol qozǵalysy erejelerine sáikes artyq júk tieýge bailanysty jii qaýip tóndiretin kóp júk tasityn kólik quraldary júrgizýshileriniń ekinshi jolaqtan (úsh jáne odan da kóp jolaqty qozǵalysty eskere otyryp) odan ári ótýge quqyǵy joq. Atalǵan tártipti buzǵany úshin kóp júk tasityn kólik júrgizýshilerine ákimshilik aiyppul tóleý týraly nusqamalar joldanatyn bolady», - delingen habarlamada.
Aita keterligi, úshinshi jolaqqa tek burylý nemese solǵa burylyp, keri baǵytqa qaitý úshin shyǵatyn júk kólikterine ruqsat etilgen.
Osy talapty saqtamaǵan kólikti «Sergek» kameralary avtomatty túrde anyqtaidy, júrgizýshige Ákimshilik quqyq buzýshylyq týraly kodekstiń 601-baby, 1-bóligi boiynsha 3 AEK mólsherinde aiyppul salynǵany jóninde qujat jiberiledi.
Eske sala ketsek, buǵan deiin Nur-Sultan qalasynyń ákimdiginde ótken elordany damytý máseleleri jónindegi májiliste «Sergek» jobasy qoǵamdyq qaýipsizdikti arttyrý úshin tolyq kólemde paidalanylmai otyrǵany aitylǵan bolatyn.
