Parlament Senatynyń jalpy otyrysynda «Qazaqstan Úkimeti men Bilim, ǵylym jáne mádeniet máseleleri jónindegi Birikken Ulttar Uiymy (IýNESKO) arasyndaǵy IýNESKO aiasynda Mádenietterdi jaqyndastyrý halyqaralyq ortalyǵyn (2-sanat) qurý týraly kelisimdi ratifikatsiialaý týraly» Zańy qabyldandy, dep habarlaidy "Ult aqparat".
Zań jobanyń maqsaty - Almaty qalasynda «Mádenietterdi jaqyndastyrý ortalyǵy» memlekettik mýzeii» respýblikalyq memlekettik qazynalyq kásipornynyń negizinde IýNESKO-nyń qamqorlyǵymen mádenietterdi jaqyndastyrý halyqaralyq ortalyǵynyń (2-sanat) jumys isteýin qamtamasyz etý.
«2015 jyly Elbasy Nursultan Nazarbaev IýNESKO-da Qazaqstan bastamashylyǵymen jáne BUU Bas Assambleiasy jariialaǵan Mádenietterdi jaqyndastyrýdyń halyqaralyq onjyldyǵyn (2013-2022 jj.) ótkizý aiasynda IýNESKO-men birlesip mádenietterdi jaqyndastyrýdyń halyqaralyq institýtyn qurý týraly usynyspen sóz sóilegen bolatyn. Atalǵan ideiany iske asyrý úshin josparly jumystar júrgizildi. Osylaisha, QR Úkimetiniń 2015 jylǵy jeltoqsandaǵy qaýlysymen «Mádenietterdi jaqyndastyrý ortalyǵy» memlekettik mýzeii quryldy», - dedi QR Mádeniet jáne sport ministri Aqtoty Raiymqulova.
2017 jylǵy qarashada IýNESKO-nyń Bas konferentsiiasynyń 39-shy sessiiasy otyrysynda ortalyqqa IýNESKO-nyń 2-shi sanaty mártebesi berildi. 2019 jylǵy maýsymda QR Úkimeti men IýNESKO arasynda IýNESKO-nyń 2-sanattaǵy mekemesi – Mádenietterdi jaqyndastyrýdyń halyqaralyq ortalyǵyn uiymdastyrý týraly kelisimge qol qoiyldy.
«Kelisimdi ratifikatsiialaý máselesi osy júrgizilgen jumystardyń qisyndy aiaqtalýy bolyp sanalady. Osy turǵydan, joǵaryda baiandalǵandy eskere otyryp, berilgen shartty ratifikatsiialaý eldiń halyqaralyq deńgeide ornyqty damýyna yqpal etetin bolady. Ortalyq etnostardyń, mádenietter men dinderdiń shyǵý tegi salasyndaǵy irgeli jáne qoldanbaly zertteýler júrgizýge, mádenietaralyq qoǵamdardyń jáne olardyń biregeiliginiń qalyptasýyna, beibitshilik pen turaqty damý múddesinde mádenietaralyq dialog qundylyqtaryn taratýǵa baǵyttalǵan halyqaralyq yntymaqtastyqqa arnalǵan biregei platforma bolady. Mádenietterdi jaqyndastyrý ortalyǵyna IýNESKO-nyń 2-sanaty mártebesin berý elimizdiń ulttyq múddelerine jaýap beredi, Qazaqstan Respýblikasy úshin saiasi jáne áleýmettik paidaly, IýNESKO júiesinde bizdiń bastamalarymyzdy iske asyrýdy tiimdi ilgeriletýge yqpal etedi», - dedi ministr.
