Ádilet ministri Marat Beketaev senatorlarǵa Májilis maquldaǵan Ákimshilik rásimdik-protsestik kodeksiniń jobasyn tanystyrdy, dep habarlaidy QazAqparat.
«Ózderińizge málim, qazirgi ýaqytta, jariia-quqyqtyq daýlarda, memlekettik apparat azamatqa qarsy bolǵan kezde taraptardyń teńsizdigi oryn alady. Azamattardyń múmkindikteri memlekettik apparat resýrstarymen sáikes kelmeidi. Bul týraly Memleket basshysy Qazaqstan halqyna Joldaýynda atap ótkenin bilesizder. Osyǵan orai, Memleket basshysy ákimshilik ádilet qurylymyn engizý qajettiligin belgiledi. Osy mindetterdi sheshý úshin Ádilet ministrligi Joǵarǵy Sotpen birlesip - Ákimshilik rásimdik-protsestik kodeksiniń jobasyn ázirledi», - dedi Marat Beketaev Parlament Senatynyń otyrysynda.
Ministrdiń aitýynsha bul zań quqyqtyq júie úshin jańa qujat. Kodeks jobasy birneshe maqsattardy kózdeidi.
«Birinshiden, azamattarǵa basqarýshylyq sheshimderdi qabyldaý protsesine belsendi qatysýǵa múmkindik beretin kepildikter jiyntyǵyn bekitýdi kózdeledi. Ekinshiden joǵary turǵan organ men sotta bilik organdary daýlardy qaraý kezinde azamattardyń quqyqtaryn qorǵaýdyń tiimdi tetikterin belgileý kerek. Osyǵan orai, Kodeks jobasy eki negizgi bólikten turady. Ol – ákimshilik rásimder jáne ákimshilik sot isin júrgizý», - dedi ol.
Marat Beketaev ákimshilik rásimderdi retteý bóliginde jobada mynadai negizgi erejelerdi kózdeitinin jetkizdi:
1. Bilik ókilettigin tek memlekettik organdar ǵana emes, ózge de tulǵalar júzege asyratynyn eskere otyryp, «ákimshilik organ» uǵymyn bekitý usynylady.
2. Bilik sýbektileri tarapynan yqtimal teris paidalanýshylyqtan jeke tulǵalardy qorǵaýǵa arnalǵan jańa qaǵidattar engizilýde.
3. Bilik organdarynyń basqarý sheshimderin qabyldaý kezinde azamattarmen «keri bailanysty» qamtamasyz etetin rásimdik kepildikter bekitiledi.
4. Azamattar úshin qolaily quqyqtyq sheshimderdi joiýdyń erekshe tártibi engiziledi.
5. Kodekstiń jobasynda mindetti túrde daýlardyń sotqa deiingi shaǵymdaný institýty engiziledi. Alaida bul salyq jáne keden daýlaryna taralmaidy.
