Senat depýtattary "2023 – 2025 jyldarǵa arnalǵan respýblikalyq biýdjet týraly" zań jobasyn májiliske qaitardy. Joǵary palata oǵan 100-den astam túzetý engizdi, dep habarlaidy Sputnik Qazaqstan.
Senatorlar úsh jyldyq biýdjettiń shyǵystaryn 71,8 mlrd teńgege arttyrý qajet dep sanaidy. Negizgi baǵyttar:
eldi mekenderdiń ishki joldary men kópir salý jáne rekonstrýktsiialaýǵa – 13,7 mlrd teńge, sonyń ishinde 2023 jylǵa 7,8 mlrd teńge;
sý qubyry jelilerin salý jáne rekonstrýktsiialaýǵa – 22,1 mlrd teńge (2023 jyly – 8,1 mlrd teńge);
gazben jabdyqtaýǵa – 13,9 mlrd teńge (2023 jyly
-1,4 mlrd teńge);
injenerlik-kommýnikatsiialyq infraqurylym salýǵa – 6,3 mlrd teńge (2023 jyly – 2,0 mlrd teńge);
syrtqy elektrmen jabdyqtaý nysandaryn salýǵa – 2,0 mlrd teńge.
Jalpy, zań jobasyn talqylaý barysynda 113 usynys kelip túsken. Bári salystyrmaly kestege engizildi. Sosyn "2023-2025 jyldarǵa arnalǵan respýblikalyq biýdjet týraly" zań jobasymen birge májiliske qaitaryldy.
Al "Qazaqstan Respýblikasynyń Ulttyq qorynan 2023 – 2025 jyldarǵa arnalǵan kepildendirilgen transfert týraly" zań qabyldandy.
