Senator Saǵyndyq Luqpanov temirjol salasyndaǵy olqylyqtarǵa nazar aýdaryp, premer-ministrdiń atyna depýtattyq saýal joldady, dep habarlaidy "Ult aqparat".
Onyń aitýynsha, Qazaqstannyń temirjol parkindegi vagondardyń aitarlyqtai bóligi ábden tozǵan. Sondai-aq, satyp alynǵan jańa vagondar da kózdegen maqsatqa sai emes. Olardyń jyldamdyǵy - asaǵatyna 160 shaqyrym. Al keibir kórshi memleketterde saǵatyna 250 shaqyrym jyldamdyqpen júitkitin poiyzdar qatynaidy.
"Osyǵan bailanysty elimizde jyldamdyǵy joǵary tasymaldaý qyzmetin ári qarai damytýǵa qatysty másele týyndap otyr. Bul azdai, bizdiń elimiz temirjol jelisiniń damýy jaǵynan da artta qalyp keledi", - dedi Luqpanov.
Ol Qazaqstanda paidalanylyp júrgen temirjol jelisiniń jalpy uzyndyǵy 16 634,8 shaqyrymdy quraitynyn atap ótti. Onyń 4,2 myń shaqyrymy ǵana elektrmen jabdyqtalǵan.
Máselen, Reseide temirjol uzyndyǵy 85,5 myń shaqyrym bolsa, onyń 43,7 myń shaqyrymy elektrlendirilgen. Al aýmaǵy Qazaqstannan 5 ese kishi Frantsiiada temirjol uzyndyǵy 29 myń shaqyrymdy quraidy. Onyń 15 myń shaqyrymy elektrmen qamtamasyz etilgen, dep jalǵastyrdy depýtat.
Sondai-aq, senator eldegi basty temirjol operatorynyń syrtqy qaryzyna da alańdaýshylyq bildirdi.
"Qaryz kólemi búginde 1,9 trillion teńgeni quraidy. Sońǵy 5 jylda memlekettik sýbsidiia retinde atalǵan kompaniiaǵa 171 milliard teńge bólingen", - dedi Luqpanov.
Odan bólek, temirjol tasymaldaýshysy basqa da jobalar arqyly tabys taýyp otyr. Áýejailar, avtojol sektory, Halyqaralyq "Qorǵas" shekaralyq yntymaqtastyq ortalyǵy kúni keshege deiin "Qazaqstan temir joly" kompaniiasynyń basqarýynda bolǵany málim. Al Aqtaý qalasyndaǵy teńiz porty áli kúnge deiin osy kompaniiaǵa tiesili, dep tolyqtyrdy senator.
"Temirjol salasyn damytýǵa qatysty baǵdarlamalyq qujattarda kórsetilgen osy baǵyttaǵy naqty maqsat-mindetterge qaramastan, olardy iske asyrý qarqyny kóńil kónshitpeidi. Tipti, múldem tómen deýge bolady. Únemi memleketten sýbsidiia alyp otyrǵanymen, kompaniia uzaq ýaqyt boiy basqa jobalardy damytýǵa aitarlyqtai qarjy jumsap keledi. Bul negizgi qyzmetti shyǵynǵa ushyratýǵa ákep soqtyrýda", - dep qapalandy depýtat.
Osyǵan bailanysty Luqpanov premer-ministrden temirjol salasyndaǵy máseleni sheshýdi jáne kompaniianyń ózi memlekettik sýbsidiiaǵa muqtaj bolyp otyrǵanyna qaramastan ne úshin salaǵa qatysy joq basqa jobalarǵa shyǵyn shyǵaratynyn túsindirýdi surady.
