Parlament Senatynyń depýtattary Úkimetten sharýalarǵa arnalǵan dizel otynynyń 50 paiyzǵa deiin arzandatýdy usyndy. Osy problema boiynsha senatorlar Úkimet basshysyna depýtattyq saýal joldap otyr, dep habarlaidy "Ult aqparat".
«Kóktemgi dala jumystaryna bólingen jeńildetilgen janar-jaǵar maidyń baǵasy áli de qymbat. Sońǵy eki aidyń kóleminde álemdegi munai baǵasy 2-2,5 ese tómendedi. Al bizdiń munai óńdeý zaýyttarynan shyǵarylatyn dizeldik otynnyń baǵasy 10 paiyzǵa ǵana arzandaǵan. Biylǵy jyldyń 1 naýryzyna dizel otynynyń 1 tonnasy 194 myń teńge bolsa, búgin 174 myń teńgeni qurap otyr. Iaǵni 1 litrine 145 teńgeden keledi. Olai bolsa aýylsharýashylyǵy taýar óndirýshileri nege 165 teńgeden alýy kerek?» - dedi onlain rejimde ótken Senat otyrysynda depýtattyq saýaldy oqyǵan senator Áli Bektaev.
Senatorlardyń paiymdaýynsha kóktemgi dala jumystary úshin arzandatylǵan janar-jaǵar maidyń baǵasy kóshedegi mai quiý beketterindegi emes, munai óńdeý zaýyttaryndaǵy baǵadan 15 paiyzǵa tómen bolýy tiis.
«Qazirgi qiyn-qystaý kezeńde memleketimizdiń azyq-túlik qaýipsizdigin qamtamasyz etý úshin munai óńdeý zaýyttarynyń aktsionerleri de, tiisti ministrlik basshylary da óziniń azamattyq pozitsiialaryn tanytýy qajet dep esepteimiz. Osylardyń barlyǵyn eskere otyryp, QR Úkimetine kóktemgi dala jumystaryna bólinetin janar-jaǵar maidyń baǵasyn 50 paiyzǵa deiin arzandatyp, sharýalarǵa ýaqtyly jetkizýdiń múmkindikterin qarastyrýdy usynamyz», - deidi Áli Bektaev.
