Parlament Senatynyń depýtaty Serik Aqylbaidyń oiynsha, lańkestik áreketti oryndaýshylardy ǵana emes, ony uiymdastyryp, adamdy terrorizmge itermelegen arandatýshylardy da ólim jazasyna kesý kerek, dep habarlaidy QazAqparat.
«Ondai adamdardy atý kerek. Búgingi Qylmystyq kodekske terrorizm úshin ǵana emes, ony uiymdastyryp, adamdy ondai áreketke itermelegeni úshin de ólim jazasyn engizý kerek. Nege? Sebebi terrorlyq aktini jasaityndar ol - oryndaýshylar ǵana. Olardyń miyn ainaldyryp, terrorizmge barýǵa itermeledi. Ol úshin uiymdastyrýshylardy atý kerek», - deidi S.Aqylbai.
Senatordyń aitýynsha, radikaldy ideialarǵa boi aldyryp ketetinder óz balalaryn tastap, qylmysqa baryp jatady. Al olardyń artynda arandatýshylar bar. Solarǵa qatysty jazany kúsheitse, dinimizge jat aǵymdardy nasihattaityndardyń sanyn azaitýǵa bolatyn edi.
«Qazirgi kezde Qytaida, Saýd Arabiiasynda ondai jaza qarastyrylǵan. Amerika shtattarynyń basym bóliginde terrorizmge itermelep, arandatýshylyq jasaǵany úshin ólim jazasy qoldanylady», - dep atap kórsetti senator.
Aita keteiik, ótken aptada Almatydaǵy atysta 10 adamnyń ómirin qiǵan Rýslan Kúlekbaev ólim jazasyna kesildi. Alaida Qazaqstanda osy sanattaǵy jazaǵa moratorii jariialanǵan.
«Prezident jarlyǵyna sáikes,elimizde ólim jazasyna qatysty sot sheshimderin iske asyrý toqtatyldy. Alaida zań boiynsha sýdialarǵa ondai sheshim shyǵarýǵa shekteý joq. Sońǵy ret Qazaqstanda adamdy ólim jazasyna kesý týraly sheshim on jyl buryn, 2006 jyly shyǵarylǵan bolatyn», - delingen Bas prokýratýranyń resmi habarlamasynda.
Qazaqstanda ólim jazasyna moratorii jariialaý týraly jarlyq 2003 jyly jeltoqsan aiynda kúshine engen bolatyn. Moratoriidiń merzimi sheksiz. Alaida ol kez kelgen ýaqytta alynyp tastalýy múmkin. Osyǵan bailanysty ólim jazasyna kesilgen azamattar túrmede ustalady.
