Foto: ashyq derekkóz
Qazaqstanda jetim balalar turǵyn úi, bilim alý jáne jumysqa ornalasý salasynda qiyndyqtarǵa tap bolýda. Senator Gennadii Shipovskih óziniń depýtattyq saýalynda osy ózekti máseleni kóterdi, dep habarlaidy Ult.kz.
Senatordyń aitýynsha, qoldanystaǵy memlekettik baǵdarlamalarǵa qaramastan, jetimder men ata-anasynyń qamqorlyǵynsyz qalǵan balalarǵa tiisti qoldaý kórsetilmei keledi. Máselen, 2023 jyly turǵyn úi kezeginde turǵan 62 290 jetim balanyń tek 809-y ǵana baspanaly boldy. Bul kórsetkish ótken jyly da shamamen osyndai deńgeide bolǵan, sol kezde 61 471 jetimniń tek 852-si ǵana úi aldy. Osy sandar jetim balalardyń baspana alý múmkindiginiń shekteýli ekenin kórsetip otyr.
Shipovskih sonymen qatar, jetim balalardyń mektepti bitirgennen keiingi ómirlik josparlaryna alańdaýly ekenin jetkizdi. Jetim balalardyń joǵary bilimge qol jetkizý múmkindigin arttyrý maqsatynda, ol kolledjder men joǵary oqý oryndarynda granttar kvotasyn kóbeitýdi usyndy.
Senatordyń aitýynsha, jetim balalardy jumyspen qamtý máselesi de nazar aýdarýdy qajet etedi. Eńbek jáne halyqty áleýmettik qorǵaý ministrliginiń derekteri boiynsha, biyl mansap ortalyqtary arqyly jumysqa ornalasqandardyń tek 85-i ǵana jetimder boldy. Bul jaǵdaidy sheshý úshin, Shipovskih kámeletke tolǵan jetim balalardy turǵyn úimen qamtamasyz etýdiń kútý merzimin qysqartý jáne olardy oqýdy aiaqtaǵannan keiin jumysqa ornalastyrý boiynsha arnaiy baǵdarlamalardy ázirleýdi usyndy.
"Men bul máselelerdi jaqsy bilemin, óitkeni ózim de ata-anamnan erte aiyrylyp, balalar úiinde tárbielengenmin," - dedi senator.
Ol bul problemalardy sheshý úshin memlekettik deńgeide naqty sharalar qabyldaý qajet ekenin atap ótti.
