Senator Nurjan Nursipatov Kegen aýylyndaǵy jaǵdaiǵa qatysty dabyl qaqty. Ol jerde Qyrǵyzstanmen aradaǵy shekara syzyǵy ótedi. Biraq tiisti belgiler joq. Al qazaqstandyq shekarashylar qaqtyǵystyń aldyn alý úshin aýyl halqyn jaiylymǵa shyǵarmai otyr, dep habarlaidy Sputnik Qazaqstan.
Qazaqstan kórshi eldermen shekarany anyqtap bekitken. Alaida demarkatsiialaý, iaǵni arnaiy belgilerdi ornatý jumystary áli tolyǵymen aiaqtalǵan joq. Ondai jerlerdiń biri – Kegen aýylyna jaqyn shekara.
"Bul jumystyń aiaqtalmaýy shekaralas óńirdegi eki el turǵyndary arasynda janjal týdyrady", - dedi Nursipatov Senattyń jalpy otyrysynda.
Búginde qazaq-qyrǵyz shekarasynda myńdaǵan shekaralyq baǵana ornatylǵan. Al Kegen turǵyndary qyrǵyz jaqtan shekara shebiniń belgilenbegenin aityp otyr. Kelisim boiynsha eki jaqtan da shekara shebi ótýi kerek.
"Qazaqstan tarapynan shekara syzyǵyna tikelei janasatyn birinshi sheptiń injenerlik bógeýishteri joq, tek ekinshi shebi jol jiegimen ornatylǵan bógeýishtermen belgilenipti. Osylaisha, birinshi jáne ekinshi shepterdiń arasyndaǵy Qazaqstannyń 4 myń gektarǵa jýyq aýyl sharýashylyǵy jáne 15 myń gektar orman sharýashylyǵy jerlerin Kegen aýdanynyń sharýa qojalyqtary óz maqsattaryna paidalana almai otyr. Óitkeni turǵyndar arasyndaǵy qaqtyǵysty boldyrmaý úshin qazaqstandyq shekarashylar azamattarymyzdy injenerlik bógetterdiń ekinshi shebi arqyly ótkizbeidi. Búginde bul jerlerdi Qyrǵyzstan azamattary shóp shabý jáne mal jailaý úshin paidalanyp jatyr. Sebebi ol jaqtan bógetter ornatylmaǵan", - dep atap ótti Nursipatov.
Al ondai jaǵdai bizdiń aimaǵymyzda shielenisti týǵyzýy múmkin. Osyǵan bailanysty senatorlar Nursipatov pen Jórgenbaev Úkimet basshysyna depýtattyq saýal joldap, shekara syzyǵyn belgileý máselesin shuǵyl sheshýdi talap etti.
