Senat depýtaty Asqar Beisenbaev Qazaqstannyń Qyrǵyzstanmen shekarasynda tekserýdi kúsheitkenin "josparly shara" dep atady jáne onyń qyrǵyz prezidenti Almazbek Atambaevtyń Qazaqstan biligi atyna aitqan syndarymen qatysyn joqqa shyǵardy, dep jazady Azattyq.
Astanada senat jiynynan soń jýrnalisterge suhbat bergen Beisenbaev "kedendik tekserý jumystary jáne Qazaqstanǵa kiretin taýardy josparly túrde tekserý burynnan bar nárse" ekenin aitty.
"Mysaly úshin, ózderińiz bilesizder, osydan biraz jyl buryn sút ónimderine qatysty, keiin jeńil ónerkásip taýarlaryna qatysty tekserý kúsheitilgen bolatyn. Sol siiaqty bul da josparly túrde istelip jatqan jumys. Men bul Atambaevtyń aitqan sózderine qatysty dep oilamaimyn" dedi Beisenbaev.
10 qazannan bastap eki el shekarasynda tekserý kúsheitilip, Qazaqstanǵa ótetin adamdar men kólikter kezegi paida bolǵan. 18 qazanda Astanada ótken kelissózder barysynda eki eldiń úkimet jetekshileri kelesi kúnnen bastap jolaýshy kólikteri men júgi bar adamdardy shekaradan ótkizýdi jeńildetý týraly ýaǵdalasqan. 25 qazanda Erevanda EAEO elderi úkimet basshylarynyń jiynynda Qazaqstan premer-ministri Baqytjan Saǵyntaev qazaq-qyrǵyz shekarasyndaǵy tekserý júk tasymaldaýshylardyń zań buzýyn anyqtaý úshin ǵana kúsheitilgenin málimdegen. Saǵyntaevtyń dereginshe, Qyrǵyzstannyń "shekarada kedendik rásimdeýdi durys júrgize almaýynan EAEO elderi milliardtaǵan dollar qarjydan aiyrylǵan".
Qyrǵyzstannyń ekonomika ministri Artem Novikov 25 qazanda Erevanda Qazaqstan eki eldiń shekarasyn retteýge arnalǵan jol kartasyna qol qoiýdan "bas tartqanyn" málimdegen. Onyń sózinshe, qazaq taraby jol kartasyna qol qoiǵannyń ózinde shekara ashylmaitynyn jáne erkin qozǵalys bolmaitynyn málimdegen.
Senator jol kartasyna qol qoimaý - "jumys protsesi" ekenin jáne memleketter arasynda kelissóz áli júrgiziletinin, máseleni "dramaǵa ainaldyrýdyń qajeti joǵyn" aitty.
