Búgin Parlament Senatynyń jalpy otyrysynda depýtat Muhtar Qul-Muhammed qashyqtan oqytý kezinde týyndaǵan máselelerge qatysty depýtattyq saýal joldady, dep habarlaidy "Ult aqparat".
Úkimet basshysynyń atyna joldanǵan saýalda depýtat qashyqtan oqytýǵa qatysty ózekti máselelerge nazar aýdarǵan. Senator otandyq onlain bilim berý platformalaryna ortaq kemshilik retinde olardyń jumys isteý jyldamdyǵynyń tómendigin aitty.
Onyń sózine qaraǵanda, internet-trafiktiń dál sondai kólemimen sheteldik onlain resýrstar men qosymshalar anaǵurlym tez jumys isteidi. Osyǵan orai depýtat jańa onlain bilim platformasyn ázirlegen kezde osy máseleniń eskerilgeni oryndy ekenin atap ótti.
Sondai-aq, saýalda qashyqtan oqytý barysynda, ásirese, sheteldik qosymshalardy paidalanǵan kezde balalardyń qaýipsizdigin qamtamasyz etý, jat beinejazbalardyń tarap ketpeýiniń aldyn alý, kezekshi synyptardy uiymdastyrý jáne bilim alý úderisine májbúrli túrde qatysa almai otyrǵan az qamtylǵan otbasylar balalarynyń sanyna taldaý júrgizý jumystaryna basa mán berilgen.
Osy aitylǵan máselelerdi eskere kele senator Memleket basshysynyń biryńǵai bilim berý onlain-platformasyn qurý týraly tapsyrmasy naqty qandai merzimde iske asyrylatynyn surady.
«Onlain bilim berý platformasyn qurýǵa múddeli memlekettik organdardyń ózara is-qimyly aiqyndaldy ma? Protsesti jyldamdatýǵa tehnikalyq múmkindikter bar ma? Bul jumysqa biýdjetten qosymsha shyǵyndar qarastyrylǵan ba? Qashyqtan oqytý aiasynda azamattardyń tegin orta bilim alýy úshin konstitýtsiialyq kepildikter qamtamasyz etilgen be?», – dedi Muhtar Qul-Muhammed.
Sondai-aq, saýal barysynda uzaq merzimdi qashyqtan oqytýdyń saldarynan bilim berý deńgeiiniń tómendeýimen bailanysty aldaǵy ýaqytta qandai sharalar qolǵa alynatyny jáne ártúrli áleýmettik toptardaǵy bilim alýshylardyń arasyndaǵy bilim berý deńgeiiniń alshaqtyqtyǵyn azaitý boiynsha Úkimettiń qandai jospary bar ekeni suraldy.
Atalǵan depýtattyq saýalǵa QR Parlamenti Senaty tóraǵasynyń orynbasary Asqar Shákirov pen senator Muhtar Qul-Muhammed qol qoidy.
