Elektr qýatyn taratý kezinde oryn alatyn shyǵyn tarif esebinen ótelip jatqandyqtan, taratýshy kompaniialar ol shyǵyndy azaitýǵa múddeli emes. QR Parlamenti Senatynda ótken dóńgelek ústelde senator Súiindik Aldashev osyndai pikir bildirdi, dep habarlaidy QazAqparat.
«Elektr energiiasynyń naryǵy - eń turaqty naryqtardyń biri sanalady. Elektr energiiasy árdaiym joǵary suranysqa ie. Energiia óndirýshi kásiporyndar tutynýshy úshin eshkimmen básekege túsip jatqan joq. Osyndai qolaily jaǵdailar energiia generatsiialaityn kompaniialardyń óz qoryn jańǵyrtýyna kepil bola almady. Qazaqstandaǵy negizgi qýat kózderi, onyń ishinde jylý stansalary 40 jyldan astam ýaqyt boiy úzdiksiz qoldanylyp keledi. Bul josparly jáne apattyq jóndeýlerdiń jiileýine túrtki bolyp otyr. Elektr óndirýshi uiymdardaǵy tozý deńgeii - 53%» - dedi depýtat.
Sondai-aq, ol energiia taratýshy kompaniialardyń qaraýyndaǵy óńirlik kompaniialardyń jelileri tozǵanynyn problema etip kóterdi.
«Óńirlik energetikalyq jelilerdegi ortasha tozý kórsetkishi – 66%. Keibir óńirlerde jelilerdiń tozýy 90%-ǵa deiin jetken. Mysaly, bul kórsetkish «Qaraǵandy REK» JShS-da - 91%, «Kókshetaý Energo» JShS, «Batys Qazaqstan REK» AQ jáne «Mejregionenergotranzit» JShS-da - 80%-dan astam. Elektr qýatyn taratý kezinde orta eseppen 18 paiyzy joǵalady. Ol joǵalǵan shyǵynnyń quny tarifke qosylady. Bul óz kezeginde kompaniialardy shyǵyn kólemin azaitýǵa yntalandyrmaidy», - dedi senator.
