Senator Álimjan Qurtaev Elbasynyń «Birlese bilgen el bárin jeńedi» atty maqalasyna orai óz pikirin bildirdi, dep habarlaidy QazAqparat.
«Halqymyzda «Kórgeni jaqsy kósh bastaidy» degen qanatty sóz bar. Qazaq kóshin 30 jyldan astam ýaqyt boiy bastap kele jatqan QR Tuńǵysh Prezidenti, Elbasy Nursultan Nazarbaevtyń búgingi úndeýi halqymyzdy birlik pen yntymaqqa shaqyrady. Tótennen kelgen náýbetpen kúresýde Qazaqstan Respýblikasynyń Prezidenti men Úkimettiń jáne jergilikti atqarýshy organdardyń qoiyp otyrǵan qatań talaptaryn saqtaýǵa úndeidi. Qytai eli qatań tártiptiń arqasynda bul indetti aýyzdyqtady. Elbasy úndeýinde aǵa-urpaq ókilderine sóz arnap, olardy eldi bir bolýǵa, yntymaqty bolýǵa, igilikti isterdiń basynda turýǵa, salaýatty ómir saltyn ustaýǵa shaqyrdy. Elbasy jas urpaq ókilderine arnaǵan sózinde «Elimizdiń bolashaǵy sizdersizder, búgingi jas urpaq egemendigimizdiń qurdastary, aǵa urpaq ókilderi sizder úshin qolynan kelgenniń barlyǵyn jasady, endi kezek sizderde dep senim artty», - dedi Á. Qurtaev.
Onyń aitýynsha, kezinde Elbasynyń bastamasymen qurylǵan túrli baǵdarlamalardyń negizinde óz isin dóńgeletken kásipkerlerdiń osyndai qiyn sátterde elge paidasyn tigizetin ýaqyt keldi.
«Elbasy kásipkerlerge sóz arnady. Táýelsizdik alǵaly Elbasynyń bastamasymen qolǵa alynǵan «Qazaqstan - 2050» baǵdarlamasynyń ishindegi indýstrialdy-innovatsiialyq damý baǵdarlamasynyń arqasynda elimizde 1 myńnan asa kásiporyndar ashyldy. Kóp kásipkerler búgingi kúni aiaǵynan turdy, endi olar men elime ne beremin degen ýaqyt keldi dedi. Óz kezeginde kásipkerler de Elbasynyń bastamasymen qurylǵan «Biz birgemiz» qoryna BAQ málimeti boiynsha 14 mlrd teńgeden astam qarjy quidy. Bul igi is ári qarai jalǵasyn tabady dep senip otyrmyz», - dedi ol.
Sondai-aq, senator Prezident pen Úkimet qabyldaǵan shuǵyl sharalar ýaqytynda júzege asyp, kez kelgen qiyndyqty eńseretinimizge senim artty.
«Qiyn kezde beldi bekem býyp, yntymaq, birlikti berik ustap Prezidenttiń, Úkimettiń talaptaryn oryndasaq, bul qiyndyqtan da shyǵamyz. Óitkeni, Elbasymyz Qazaqstandy máńgilik el bolýǵa bastaityn basty baǵyttardy aityp berdi», - dedi depýtat.
.jpeg)