Senator Murat Baqtiiaruly bilim salasynyń negizgi máselelerin kóterdi, dep habarlaidy Sputnik agenttigi.
Onyń aitýynsha, sońǵy shirek ǵasyrdyń ishinde otandyq bilim salasy reformalardan kóz ashpai keledi. Al ǵylymi turǵyda zerttelmegen reformalardy júzege asyrýda tehnikalyq múmkinshilikterimiz de, sol reformany jasaityn eń basty tulǵa – muǵalim men oqýshy, sondai-aq, ulttyq mentalitet pen psihologiiamyz eskerilmedi.
"Mysaly, 2012 jyly muǵalimderdi Kembridj tehnologiiasy boiynsha deńgeilik kýrstardan ótkizý bastaldy. 2016 jyldan bastap mektepterde úsh tilde sabaq berýdi engizdik. Osy 2016-2019 jyldary úsh tilde oqytý aiasynda 22 250 pán muǵalimi aǵylshyn tilinen biliktilikti arttyrý kýrsynan ótti. Buǵan respýblikalyq biýdjetten 13,1 milliard teńge qarjy bólindi. Qazirgi kezde osy kýrsty bitirgenniń 8 763-i ǵana aǵylshyn tilinde sabaq beredi. Qalǵan 13 478-i ne úshin kýrstan ótkeni belgisiz. Olarǵa qyrýar qarjy bólindi. Ol úshin kim jaýap beredi?", - dedi Baqtiiaruly senattyń plenarlyq otyrysynda.
Senatordyń oiynsha, jańartylǵan bilim baǵdarlamasy asyǵys engizildi. Al sońǵy reformalar kóp jaǵdaida aqsha úshin jasalǵan siiaqty.
"Osyǵan qarap, bilim salasyna reforma jasap, ártúrli baǵdarlama qabyldap, aqsha bóldirý nieti alǵa ozyp turǵandai bolyp kórinedi. Sonyń bir aiǵaǵy – eldegi orta bilim berý, onyń ishinde úshtildilikti engizý úshin Dúniejúzilik damý bankinen 66 million dollar kólemindegi kredittiń alynýy", - dep atap kórsetti Baqtiiaruly.
Onyń sózine qaraǵanda, búginde Qazaqstan balalardy orta bilimmen qamtamasyz etý jaǵynan 148 eldiń ishinen 18-shi oryn alsa, bilimniń sapasy boiynsha 84-shi orynda tur. Bul "san barda sapa jetkiliksiz" degen sóz.
