سەناتور مۇرات باقتييارۇلى بٸلٸم سالاسىنىڭ نەگٸزگٸ مەسەلەلەرٸن كٶتەردٸ, دەپ حابارلايدى Sputnik اگەنتتٸگٸ.
ونىڭ ايتۋىنشا, سوڭعى شيرەك عاسىردىڭ ٸشٸندە وتاندىق بٸلٸم سالاسى رەفورمالاردان كٶز اشپاي كەلەدٸ. ال عىلىمي تۇرعىدا زەرتتەلمەگەن رەفورمالاردى جٷزەگە اسىرۋدا تەحنيكالىق مٷمكٸنشٸلٸكتەرٸمٸز دە, سول رەفورمانى جاسايتىن ەڭ باستى تۇلعا – مۇعالٸم مەن وقۋشى, سونداي-اق, ۇلتتىق مەنتاليتەت پەن پسيحولوگييامىز ەسكەرٸلمەدٸ.
"مىسالى, 2012 جىلى مۇعالٸمدەردٸ كەمبريدج تەحنولوگيياسى بويىنشا دەڭگەيلٸك كۋرستاردان ٶتكٸزۋ باستالدى. 2016 جىلدان باستاپ مەكتەپتەردە ٷش تٸلدە ساباق بەرۋدٸ ەنگٸزدٸك. وسى 2016-2019 جىلدارى ٷش تٸلدە وقىتۋ اياسىندا 22 250 پەن مۇعالٸمٸ اعىلشىن تٸلٸنەن بٸلٸكتٸلٸكتٸ ارتتىرۋ كۋرسىنان ٶتتٸ. بۇعان رەسپۋبليكالىق بيۋدجەتتەن 13,1 ميلليارد تەڭگە قارجى بٶلٸندٸ. قازٸرگٸ كەزدە وسى كۋرستى بٸتٸرگەننٸڭ 8 763-ٸ عانا اعىلشىن تٸلٸندە ساباق بەرەدٸ. قالعان 13 478-ٸ نە ٷشٸن كۋرستان ٶتكەنٸ بەلگٸسٸز. ولارعا قىرۋار قارجى بٶلٸندٸ. ول ٷشٸن كٸم جاۋاپ بەرەدٸ?", - دەدٸ باقتييارۇلى سەناتتىڭ پلەنارلىق وتىرىسىندا.
سەناتوردىڭ ويىنشا, جاڭارتىلعان بٸلٸم باعدارلاماسى اسىعىس ەنگٸزٸلدٸ. ال سوڭعى رەفورمالار كٶپ جاعدايدا اقشا ٷشٸن جاسالعان سيياقتى.
"وسىعان قاراپ, بٸلٸم سالاسىنا رەفورما جاساپ, ەرتٷرلٸ باعدارلاما قابىلداپ, اقشا بٶلدٸرۋ نيەتٸ العا وزىپ تۇرعانداي بولىپ كٶرٸنەدٸ. سونىڭ بٸر ايعاعى – ەلدەگٸ ورتا بٸلٸم بەرۋ, ونىڭ ٸشٸندە ٷشتٸلدٸلٸكتٸ ەنگٸزۋ ٷشٸن دٷنيەجٷزٸلٸك دامۋ بانكٸنەن 66 ميلليون دوللار كٶلەمٸندەگٸ كرەديتتٸڭ الىنۋى", - دەپ اتاپ كٶرسەتتٸ باقتييارۇلى.
ونىڭ سٶزٸنە قاراعاندا, بٷگٸندە قازاقستان بالالاردى ورتا بٸلٸممەن قامتاماسىز ەتۋ جاعىنان 148 ەلدٸڭ ٸشٸنەن 18-شٸ ورىن السا, بٸلٸمنٸڭ ساپاسى بويىنشا 84-شٸ ورىندا تۇر. بۇل "سان باردا ساپا جەتكٸلٸكسٸز" دەگەن سٶز.
