Senator Murat Baqtiiaruly Baiqońyr qalasynyń talap-ótinishteri boiynsha Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Baiqońyr qalasynda qazir 77 myńnan asa halyq turatyn bolsa, onyń 70%-y qazaqstandyqtar bolyp sanalady. Baiqońyr halqynyń eń basty máselesi – qazaqstandyq standartpen bilim beretin balabaqshalar men mektepterdiń tapshylyǵy bolyp otyr. 2015 jyly QR men RF úkimetaralyq komissiiasynyń sheshimimen Reseige qarasty 5 mektep pen 1 balabaqsha Qazaqstannyń qaramaǵyna alynyp, balalarǵa qazaqstandyq standartpen qazaq tilinde bilim alýǵa múmkindik jasaldy. Osy jly memlekettik-jekemenshik áriptestik boiynsha qosymsha 2 balabaqsha ashylyp, qyzmet kórsetýde. Qazaq tilinde tálim beretin balabaqshalardyń búgingi jaǵdaiy alańdatyp otyr. Bul balabaqshalarda ana tilinde bilim berý jáne tolyqqandy mektepaldy daiarlyqty ótkizýde kemshilikter bar», - dedi Murat Baqtiiaruly.
Depýtattyń aitýynsha, ata-analary óz balalarynyń qazaq mektepterinde bilim alýy úshin tolyqqandy mektepaldy daiarlyqtan ótýleri qanaǵattandyrmai keledi. Senator óz saýalynda birneshe derekterdi alǵa tartty. Mysaly, qazaq tilinde bilim beretin Baiqońyr qalasyndaǵy 5 mektepte búgingi kúni 5 236, al reseilik 7 mektepte 4049 bala bilim alady. Onyń 1 508-i, iaǵni 37%-y Qazaqstan azamattarynyń balalary. Baiqońyrda qazir Resei Federatsiiasyna qarasty 7 mektep bar. Depýtat olardyń syiymdylyǵy tolyq qamtylmaǵan deidi. Murat Baqtiiarulynyń aitýynsha, qala turǵyndarymen kezdesý barysynda orys tilinde oqytatyn qazaqstandyq mektepke suranystyń joǵary ekenin eskere otyryp, osy 7 mekteptiń birin memleket menshigine ótkizýdi surap otyr eken.⠀
«Bul jaǵdai, reseilik mektepte oqityn balalardyń mektep bitirgennen soń UBT-ǵa qatysýyna jáne qazaqstandyq joǵary oqý oryndaryna túsýine kóp kedergi keltirýde. Sebebi emtihannyń mindetti pánderi – Qazaqstan tarihy, qazaq tili, qazaq ádebieti ol mektepterde oqytylmaidy», - dedi senator.
Odan bólek, Baiqońyrdyń ortalyq aýdandarynda Resei Federatsiiasynyń menshigindegi, syiymdylyǵy tolyq paidalanylmai turǵan 13 balabaqsha bar. Depýtat halyqtyń birneshe balabaqshany memlekettik iýrisdiktsiiaǵa ótkizý talaby oryndy dep sanaidy.
«Olar Qazaqstan aýmaǵynda týyp-óskenimen, óz jerinde turyp, meniń Otanym – Rossiia, meniń astanam – Moskva dep, Rossiianyń arǵy-bergi tarihyn, tili men ádebietin oqyp, árine reseilik patriotizm rýhynda tárbielenedi. Aita ótýimiz kerek, biz jerimizdi jalǵa bergenimizben, sol jerde turyp jatqan halqymyzdy jalǵa bergen joqpyz ǵoi», - dedi Murat Baqtiiaruly.
Senator Úkimet basshysynan Baiqońyr qalasy turǵyndarynyń bilim berý salasyna qatysty osy túitkildi máselesin basty nazarǵa alyp, oń sheshilýine yqpal etýin surady.
