Aýyldyq jerdegi orta bilim berý sapasynyń tómendiginen balalar memlekettik granttar alýǵa qaýqarsyz. Bul týraly Senat depýtaty Aqylbek Kúrishbaev málim etti, dep habarlaidy "Ult aqparat".
«Aýyldyq aimaqtardaǵy bilim berý nysandaryna qajettilik 312-ge jetti, 32 mektep - apatty jaǵdaida, 86-sy - úsh aýysymdy. Munda 2 240 pedagog jetispeidi, bul elimizdegi jalpy qajettiliktiń 75 paiyzyn quraidy. Ásirese, aýyl mektepterindegi bilim berý máseleleri qatty alańdatady. PISA nátijelerine súiensek, qala men aýyl arasyndaǵy bilim sapasynda 22-den 37 balǵa deiingi alshaqtyq bar. Ulttyq biryńǵai test nátijeleri boiynsha, aýyl mektepteriniń túlekteri qalalyq oqýshylarynan orta eseppen 5-6 ballǵa artta qalyp otyr. Sondyqtan da aýyldyq jerdegi orta bilim berý sapasynyń tómendiginen kóptegen daryndy balalar joǵary oqý oryndaryna memlekettik granttar alýǵa ie bola almaidy», - dedi depýtat Senattaǵy aýyldyq aýmaqtardy damytý jónindegi parlamenttik tyńdaýda.
Onyń aitýynsha, aýyldarda 550 mádeni nysan, sport zaly qajet, 150-ge jýyq kitaphana jetispeidi. Aýyldyń mádeni-sporttyq infraqurylymyn damytý kórsetkishteri ákimderdi baǵalaý kriteriiasyna da kirmeidi.
«Bilim berý granttaryndaǵy aýyldyq kvotany 30 paiyzdan kem degende 50 paiyzǵa deiin kóbeitý kerek. Sonymen qatar, basqa elderdegidei, agroqurylymdardyń stýdentterdi ýniversitetterde oqytýǵa jumsaǵan qarajat shyǵyndaryn sýbsidiialaý óte mańyzdy», - dedi A. Kúrishbaev.
