اۋىلدىق جەردەگٸ ورتا بٸلٸم بەرۋ ساپاسىنىڭ تٶمەندٸگٸنەن بالالار مەملەكەتتٸك گرانتتار الۋعا قاۋقارسىز. بۇل تۋرالى سەنات دەپۋتاتى اقىلبەك كٷرٸشباەۆ مەلٸم ەتتٸ, دەپ حابارلايدى "ۇلت اقپارات".
«اۋىلدىق ايماقتارداعى بٸلٸم بەرۋ نىساندارىنا قاجەتتٸلٸك 312-گە جەتتٸ, 32 مەكتەپ - اپاتتى جاعدايدا, 86-سى - ٷش اۋىسىمدى. مۇندا 2 240 پەداگوگ جەتٸسپەيدٸ, بۇل ەلٸمٸزدەگٸ جالپى قاجەتتٸلٸكتٸڭ 75 پايىزىن قۇرايدى. ەسٸرەسە, اۋىل مەكتەپتەرٸندەگٸ بٸلٸم بەرۋ مەسەلەلەرٸ قاتتى الاڭداتادى. PISA نەتيجەلەرٸنە سٷيەنسەك, قالا مەن اۋىل اراسىنداعى بٸلٸم ساپاسىندا 22-دەن 37 بالعا دەيٸنگٸ الشاقتىق بار. ۇلتتىق بٸرىڭعاي تەست نەتيجەلەرٸ بويىنشا, اۋىل مەكتەپتەرٸنٸڭ تٷلەكتەرٸ قالالىق وقۋشىلارىنان ورتا ەسەپپەن 5-6 باللعا ارتتا قالىپ وتىر. سوندىقتان دا اۋىلدىق جەردەگٸ ورتا بٸلٸم بەرۋ ساپاسىنىڭ تٶمەندٸگٸنەن كٶپتەگەن دارىندى بالالار جوعارى وقۋ ورىندارىنا مەملەكەتتٸك گرانتتار الۋعا يە بولا المايدى», - دەدٸ دەپۋتات سەناتتاعى اۋىلدىق اۋماقتاردى دامىتۋ جٶنٸندەگٸ پارلامەنتتٸك تىڭداۋدا.
ونىڭ ايتۋىنشا, اۋىلداردا 550 مەدەني نىسان, سپورت زالى قاجەت, 150-گە جۋىق كٸتاپحانا جەتٸسپەيدٸ. اۋىلدىڭ مەدەني-سپورتتىق ينفراقۇرىلىمىن دامىتۋ كٶرسەتكٸشتەرٸ ەكٸمدەردٸ باعالاۋ كريتەريياسىنا دا كٸرمەيدٸ.
«بٸلٸم بەرۋ گرانتتارىنداعى اۋىلدىق كۆوتانى 30 پايىزدان كەم دەگەندە 50 پايىزعا دەيٸن كٶبەيتۋ كەرەك. سونىمەن قاتار, باسقا ەلدەردەگٸدەي, اگروقۇرىلىمداردىڭ ستۋدەنتتەردٸ ۋنيۆەرسيتەتتەردە وقىتۋعا جۇمساعان قاراجات شىعىندارىن سۋبسيدييالاۋ ٶتە ماڭىزدى», - دەدٸ ا. كٷرٸشباەۆ.
