Foto: Lada.kz
Senator Andrei Lýkin Úkimet basshysynyń atyna joldaǵan depýtattyq saýalynda jerleý qyzmetteri salasyndaǵy qordalanǵan máselelerdi kóterdi, dep habarlaidy Ult.kz.
Depýtattyń aitýynsha, Qazaqstanda jerleý qyzmetteri salasynda aitarlyqtai máseleler jinalyp qalǵan. Olardyń ishinde zańsyz jumys isteitin jerleý biýrolary, zirattardy kútip-ustaý problemasy jáne memlekettik baqylaýdyń joqtyǵy da bar. Zirattardy jeke menshikke berý qoǵamda alańdaýshylyq týǵyzyp, baǵanyń ósýine, jerleý oryndaryna qoljetimdiliktiń shektelýine jáne dástúrdiń buzylýyna ákelýi múmkin.
«Tájiribe kórsetip otyrǵandai, jerleý qyzmetteri naryǵyn básekelestik ortaǵa berý monopoliiaǵa ainalý jáne qylmystyq áreketke ulasý qaýpin týdyrady. Bul alaiaqtyqqa, ýchaskelerdi zańsyz satyp, aqshaǵa bólýge, sondai-aq jerleý esebin júrgizýde túrli aldarqatýǵa – jerleý oryndaryn qaita satýǵa, zańsyz eksgýmatsiiaǵa ákelýi múmkin. Munyń bári azamattardyń quqyǵyn buzyp, quqyq qorǵaý organdarynyń jumysyna áser etedi», – dep atap ótti senator Lýkin.
Senator osyǵan bailanysty zirattardyń tek memlekettik menshik obektisi retinde zańnamalyq deńgeide bekitilýin, jerleý rásimine memlekettik tsifrlyq esep júrgizý júiesin qurýdy, jerleý qyzmetteri baǵasyna baqylaýdy engizýdi jáne jerleý oryndaryna zańsyz mámile jasaýǵa qatań jaýapkershilik belgileýdi usyndy.
«Marqumdardy jerleýge bailanysty qatynastardy retteý jáne jerleý isiniń quqyqtyq negizderin aiqyndaý maqsatynda ýákiletti memlekettik organdarǵa «Qazaqstan Respýblikasyndaǵy jerleý jáne jerleý isi týraly» zań jobasyn ázirleýdi tapsyrǵan jón dep sanaimyz», – dedi Lýkin.
