Balalardy kiberbýllingten qorǵaý týraly zań jobasyna qatysty qoǵam men halyqaralyq uiymdar ókilderinen 26-dan astam usynys túsken. Bul týraly Senat depýtaty Beibit Isabaev aityp berdi, dep habarlaidy QazAqparat.
«Bizdiń komitettiń múshesi Dinara Nóketaeva jumys tobymen birge zań jobasyn qaraý barysynda qoǵam men halyqaralyq uiymdar ókilderinen 26-dan astam usynys túskenin aitty. Bul túzetýlerdiń barlyǵy qoǵamnyń, azamattyq sektordyń talaptaryna tikelei bailanysty. Biz olardyń pikirin eskerdik», - dedi Beibit Isabaev Senattyń jalpy otyrysynan keiin tilshilerge bergen suhbatynda.
Depýtattyń aitýynsha, qoǵam tarapynan túrli reaktsiia týdyrǵan normalardyń barlyǵy alynyp tastaldy.
Sonymen birge, senator Qazaqstannyń memlekettik organdarymen ózara is-qimyl jasaý úshin internet-resýrstardyń resmi ókiliniń bolýy týraly normany túsindirdi.
«Resmi ókilderin anyqtaý úshin Qazaqstannan tys jerlerde ornalasqan baspagerlermen, zamanaýi internet-resýrstardyń ielerimen kelisim jasaý týraly tarmaq bar. Biraq bul resmi ókilderdiń Qazaqstan aýmaǵynda bolýy mindetti emes. Eń bastysy, resmi ókil táýliktiń kez kelgen ýaqytynda Qazaqstannyń qoldanystaǵy zańnamasyn saqtaý máseleleri, onyń ishinde balalarǵa qatysty kiberbýlling máseleleri boiynsha Qazaqstannyń ýákiletti organymen ózara is-qimyl jasaýy tiis», - dedi depýtat.
Eske sala ketsek, búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten zań jobasy Májiliske qaitaryldy.
