Senat depýtattary Ulttyq bank tóraǵasy laýazymyna Ǵalymjan Pirmatovtyń kandidatýrasyn maquldady, dep habarlaidy QazAqparat.
Konstitýtsiiaǵa sáikes Ulttyq bank tóraǵasynyń kandidatýrasyna kelisim berý Senattyń erekshe quzyryna jatady.
«Konstitýtsiiaǵa sáikes, Prezidenttiń Ulttyq bank tóraǵasyn taǵaiyndaýyna kelisim berý Senattyń erekshe qaraýyna jatady. Senattyń kelisimin alý úshin Prezident palataǵa tiisti usynym engizdi», - dedi Senat tóraǵasy Máýlen Áshimbaev.
Óz kezeginde QR Prezidenti Ákimshiligi basshysynyń birinshi orynbasary Timýr Súleimenov Memleket basshysy Qasym-Jomart Toqaev Senattyń qaraýyna kelisim alý úshin Ulttyq bank tóraǵasy laýazymyna úmitker retinde Ǵalymjan Pirmatovty usynyp otyrǵanyn jetkizdi.
Palata depýtattary atalǵan kandidatýraǵa biraýyzdan kelisim berdi.
Ǵalymjan Oljaiuly Pirmatov 1972 jyly týǵan. Novosibir memlekettik ýniversitetin bitirgen. Mamandyǵy boiynsha - matematik.
«Qazaqstan halyq banki» AQ-da qyzmet etti. «BTA Bank» AQ basqarma tóraǵasynyń birinshi orynbasary qyzmetin atqardy. QR Ekonomika jáne biýdjettik josparlaý vitse-ministri, al 2015-2017 jyldary Ulttyq bank tóraǵasynyń orynbasary boldy.
2018-2021 jyldary «Qazatomónerkásip» UAK» AQ basqarma tóraǵasy qyzmetin atqardy.
