Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine týristik qyzmet máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy QazAqparat.
«Zań jobasynyń negizgi maqsaty - retteýshi quraldardy ońtailandyrý, týristik salany memlekettik qoldaý sharalaryn aiqyndaý, sondai-aq kóshpeli týrizmniń qyzmetin retteý arqyly ishki jáne kelý týrizmin damytýdy yntalandyrý boiynsha quqyqtyq jaǵdailar jasaý. Zań jobasyn qabyldaý týristik saladaǵy memlekettik retteýdi odan ári jetildirýge, týristik qyzmet salasyndaǵy zańnamanyń sapasyn arttyrýǵa jáne investitsiialar tartý tetigi arqyly týristik salany damytýǵa múmkindik beredi. Zań jobasy boiynsha Senattyń turaqty komitetterinen eskertýler men usynystar túsken joq», - dedi senator Dinar Nóketaeva atalǵan qujatty ekinshi oqylymda qaraý barasynda.
Senat tóraǵasy Máýlen Áshimbaevtyń aitýynsha, búgin qabyldanǵan zań osy baǵytta keshendi zańnamalyq negiz qalyptastyratynyn aitty.
«Elimizde týrizm salasyn damytý mańyzdy maqsattardyń biri. Búgin qabyldanǵan zań osy baǵytta keshendi zańnamalyq negiz qalyptastyrady. Soǵan sáikes qarjylai qoldaý tetikteriniń de aýqymy keńeidi. Olardyń qatarynda investitsiialyq jeńildikter, týristik qyzmetti yntalandyrý, syrttan týrister ákeletin týroperatorlardyń shyǵyndaryn sýbsidiialaý siiaqty basymdyqtar bar», – M. Áshimbaev.
Aita keteiik, búgin Senattyń jalpy otyrysynda atalǵan qujatty birinshi oqylymda talqylaý kezinde QR Mádeniet jáne sport ministri Aqtoty Raiymqulova elimizde basym týristik aýmaq uǵymy engiziletinin atap ótti.
«Basym týristik aýmaq - týristik kartanyń respýblikalyq obektiler tizimine engizilgen, týristik damýdyń erekshe áleýeti bar aýmaq. Basym týristik aýmaq resýrstardy týrizmdi damytýdyń perspektivaly núktelerinde shoǵyrlandyrý maqsatynda qurylady. Sondai-aq, bul aýmaqta investorlar úshin erekshe jeńildikter jáne qazaqstandyqtardyń elde demalýǵa baǵyttalǵan ilgeriletý sharalary qarastyrylǵan», - dedi ministr.
Sonymen qatar ol sheteldik týristerge qatysty týristik alym júiesin engizý qarastyrylǵanyn atap ótti.
Týrizm salasyn memlekettik qoldaýdyń jańa sharalaryn engizýge bailanysty ýákiletti jáne basqa memlekettik organdarǵa tiisti qosymsha quzyretter beriledi:
- týristik nysandar men jol boiyndaǵy qyzmet kórsetý obektilerin salýǵa kásipkerlik sýbektileri shyǵyndarynyń bir bóligin óteý;
- týristik maqsattarǵa arnalǵan kólik quraldary men taý shańǵysy kýrorttaryn damytýǵa arnalǵan jabdyqtar alýǵa shyǵyndardyń bir bóligin óteý;
- týristik paket aiasynda árbir kelgen sheteldik týrist úshin týroperatorlardy sýbsidiialaý;
- týristik paket aiasynda balalarǵa arnalǵan ushý bileti úshin tasymaldaý tólemin óteý.
Ministrlik málimetinshe, bul sharalardy júzege asyrý ekonomikaǵa biýdjettiń qosymsha kirisi túrinde 135 mlrd teńgeni tartýǵa, 170 myńnan astam jumys ornyn qurýǵa jáne kem degende 1000 jobany iske asyrýǵa múmkindik beredi.
