Qazaqstan Parlamenti Senatynyń Tóraǵasy Máýlen Áshimbaev Reseidiń Sankt-Peterbor qalasynda ótken TMD Parlamentaralyq Assambleiasynyń 53-plenarlyq otyrysyna qatysty. Bul jaiynda Senattyń baspasóz qyzmeti málim etti, dep habarlaidy "Ult aqparat".
Óz sózinde Senat Spikeri TMD Parlamentaralyq Assambleiasy Keńesiniń mereitoilyq otyrysyn Almaty qalasynda ótkizý máselesi boiynsha Qazaqstanǵa qoldaý bildirgenderi úshin áriptesterine alǵys bildirdi. Atalǵan is-shara kelesi jyldyń naýryz aiynda ótkiziledi dep josparlanyp otyr.
Sondai-aq Máýlen Áshimbaev Qazaqstan Respýblikasy kelesi jyly TMD-ǵa tóraǵalyq etetinine nazar aýdardy. Osyǵan orai elimiz qazirgi tańda bul baǵytta belsendi jumys júrgizýde.
«Memleket basshysy Qasym-Jomart Toqaev Qazaqstannyń TMD-ǵa tóraǵalyq etý tujyrymdamasyn bekitti. Tóraǵalyq kezeńindegi basymdyqtar anyqtaldy. Solardyń biri parlamenttik diplomatiia baǵyty boiynsha jumys. Qazaqstan óziniń tóraǵalyǵy aiasynda Dostastyq elderiniń aldynda turǵan mindetterdi atqarýda TMD PAA-ǵa odan ári belsendi qoldaý kórsetedi», – dedi Máýlen Áshimbaev.
Plenarlyq otyrysqa qatysýshylar pandemiiadan keiingi kezeńdegi damý máselelerin talqylap, epidemiologiialyq ahýaldy turaqtandyrý boiynsha jumysty jalǵastyrýdyń mańyzdylyǵyna toqtaldy. Osy oraida Qazaqstan Senatynyń Tóraǵasy bolashaqta biologiialyq apattar men osyndai daǵdarystardyń aldyn alý úshin Dostastyq elderi birlesip áreket etýdiń bereri mol ekenin aitty. Sondai-aq ol seriktes memleketterdi Qazaqstannyń Biologiialyq qaýipsizdik jónindegi halyqaralyq agenttik qurý jónindegi bastamasyn qoldaýǵa shaqyrdy.
«Byltyr Qazaqstan Prezidenti Qasym-Jomart Toqaev BUU janynan Biologiialyq qaýipsizdik jónindegi halyqaralyq agenttik qurý týraly bastama kóterdi. Bul qurylym qurylǵan jaǵdaida koronavirýs pandemiiasy siiaqty daǵdarystarǵa jol bermeý úshin aldyn-alý sharalaryn qabyldaýdy kózdeidi. Odan bólek, Agenttik tarapynan adamzatqa tónetin syn-qaterler men qaýipterdiń jańa túrlerine qarsy turýǵa yqpal etýge múmkindik týar edi. Qazirgi tańda barlyq múddeli taraptarmen praktikalyq konsýltatsiialyq jumys júrgizilýde. Biz TMD elderindegi áriptesterimizdi Qazaqstannyń Biologiialyq qaýipsizdik jónindegi halyqaralyq agenttik qurýǵa qatysty bastamasyn qoldaýǵa shaqyramyz», – dedi Máýlen Áshimbaev.
Otyrys barysynda parlamentshiler Dostastyq elderiniń ulttyq zańnamalarynda qoldaný úshin PAA ázirlegen modeldik zań jobalaryn qarady.
Sonymen qatar Máýlen Áshimbaev Assambleia alańynda birqatar ekijaqty kezdesý ótkizdi. Ózbekstan Olii Majlis Senatynyń Tóraiymy Tanzila Narbaevamen kezdesýde eki eldiń parlamentaralyq ózara is-qimylyn odan ári nyǵaitý máselesi sóz boldy.
Suhbattasý barysynda eki memlekettiń Senattary arasynda qurylǵan Yntymaqtastyq jónindegi komissiia parlamentaralyq bailanystyń mańyzdy tetigi ekeni atap ótildi. Máýlen Áshimbaev Komissiianyń kezekti otyrysyn kelesi jyldyń birinshi jartysynda Qazaqstanda, Aral óńirinde ótkizýdi usyndy.
«Komissiia otyrysynda Aral teńizin qalpyna keltirý baǵytyndaǵy ózara jumysty jáne basqa da máselelerdi talqylaýǵa mol múmkindik bar. Jalpy, sý máselesi bizdiń ekijaqty qatynastarymyzda erekshe oryn alady. Elderimizdiń sý-energetikalyq áleýetin utymdy paidalaný jáne transshekaralyq ózenderdiń ekologiiasyn qorǵaý máseleleri boiynsha dialogty odan ári jalǵastyrý mańyzdy. Qazaqstan Prezidenti atap ótkendei, «sý diplomatiiasy» aiasyndaǵy kelissózderdiń tezirek aiaqtalýy bizdiń elderimizdiń jáne Ortalyq Aziia memleketteriniń ortaq múddelerine sai keledi», – dedi Máýlen Áshimbaev.
Qazaqstan Senatynyń Spikeri Resei Federatsiiasy Federaldyq Jinalysy Federatsiia Keńesiniń Tóraiymy Valentina Matvienkomen kezdesýde de transshekaralyq ózender máselesin qozǵady. Máýlen Áshimbaev bul másele eki eldiń Prezidentteri qatysqan Qazaqstan men Reseidiń XVII Óńiraralyq yntymaqtastyq forýmynda jáne Valentina Matvienkonyń biylǵy maýsym aiynda Qazaqstanǵa jasaǵan saparynda da kóterilgenin tilge tiek etti.
Osyǵan orai Máýlen Áshimbaev bul baǵyttaǵy jumysty jandandyrýdy jáne atalǵan máseleni salalyq memlekettik organdardy jumyldyra otyryp parlamenttik deńgeide talqylaýdy usyndy. Sondai-aq ol osy jáne basqa da usynystardy Qazaqstan Parlamentiniń Senaty men Resei Federaldyq Jinalysy Federatsiia Keńesi arasyndaǵy yntymaqtastyq jónindegi komissiianyń aldaǵy otyrysynyń kún tártibine qosý máselesine nazar aýdardy. Komissiia otyrysy kelesi jyldyń alǵashqy jartysynda ótkizilmek.
«Sý máselesi bizdiń óńirimiz úshin ózekti túitkil. Tipti transshekaralyq sý resýrstaryn utymdy jáne uqypty paidalaný óńirlik damýdyń mańyzdy faktory bolyp sanalady. Odan bólek, pandemiiadan keiingi jaǵdaida turaqty damý máselesi de eki eldiń parlamentshileri úshin mańyzdy ekeni sózsiz. Biz Senat jumysynda aýyldyq aýmaqtardy keshendi damytý, onyń ishinde infraqurylymdy, áleýmettik nysandardy, biznesti órkendetý, jumys oryndaryn qurý máselelerine basa mán beremiz. Osy baǵyttardy zańnamalyq turǵydan qamtamasyz etý boiynsha reseilik áriptesterimizben tájiribe almasýǵa múddelimiz», – dedi Qazaqstan Parlamenti Senatynyń Tóraǵasy.
