Senat tóraǵasy Máýlen Áshimbaev eldi alańdatyp otyrǵan óńirlerdegi qýańshylyq máselesine nazar aýdaryp, Aýyl sharýashylyǵy ministrligin bul túitkildi sheshý úshin belsendilik tanytýǵa shaqyrdy, dep habarlaidy "Ult aqparat".
Senat baspasóz qyzmetiniń habarlaýynsha, Almaty oblysyna jumys sapary barysynda sharýalarmen kezdesken Senat spikeri qazirgi tańda elimizdiń keibir aimaqtarynda qurǵaqshylyq beleń alǵanyn, soǵan bailanysty jergilikti sharýashylyqtar aitarlyqtai zardap shegip otyrǵanyn aitty.
Ol bul problemaǵa Memleket basshysy da nazar aýdaryp, ony jedel sheshý úshin tiisti organdarǵa naqty tapsyrmalar bergenin tilge tiek etti.
«Memleket basshysy Reformalar jónindegi joǵary keńestiń sońǵy otyrysynda mal sharýashylyǵyna aitarlyqtai saldaryn tigizip otyrǵan qýańshylyq máselesine nazar aýdardy. Qazirgi tańda bul – búkil eldi alańdatyp otyrǵan problema. Sondyqtan tiisti Ministrlik osy máseleni sheshý úshin bar kúsh-jigerin jumsaýy kerek. Bul jolda júieli qadamdar qajet. Aýyl sharýashylyǵy ministrligi jedel túrde ahýaldyń saldaryn taldap, jaǵdaidy jan-jaqty saraptap, máseleni sheshý joldaryn usynýǵa tiis», – dedi Máýlen Áshimbaev.
Sonymen qatar palata tóraǵasy senatorlar aýyldyq jerlerdiń infraqurylymyn damytý, veterinariia jáne azyq-túlik qaýipsizdigi máselelerin de jii kóterip kele jatqanyn atap ótti.
Ol byltyrǵy biýdjettiń oryndalýy týraly Úkimettiń esebin qaraý kezinde Senat depýtattary agrarlyq salany qarjylandyrýdaǵy olqylyqtarǵa nazar aýdarǵanyn aitty.
«Aýyl sharýashylyǵyndaǵy negizgi máselelerdiń biri salanyń tolyq qarjylandyrylmaýy bolyp otyr. Mysaly, 2020 jyly agrarlyq sektorǵa josparlanǵan qarajattyń jartysynan astamy ǵana bólingen», – dedi Senat Tóraǵasy.
Sondai-aq, Almaty oblysynyń sharýalarymen kezdesýde qýańshylyq máselesin sheshýde júieli jumys júrgizý qajettigi, mundai tótenshe jaǵdaiǵa daiyndyq árdaiym basty nazarda bolý kerektigi aityldy.
