Senat Tóraǵasy Máýlen Áshimbaev BUU Bas Assambleiasy 75-sessiiasynyń tóraǵasy Volkan Bozkyrdy qabyldady, dep habarlaidy "Ult aqparat" joǵarǵy palatanyń baspasóz qyzmetine silteme jasap.
Kezdesý barysynda Qazaqstannyń BUU-men jáne onyń qurylymdyq bólimshelerimen ózara is-qimyl máseleleri sóz boldy.
«Birikken Ulttar Uiymymen ózara tyǵyz bailanys ornatý - Qazaqstannyń syrtqy saiasatyndaǵy basym baǵyttardyń biri. Búginde Qazaqstanda uiym bólimsheleriniń 27 ókildigi jumys isteidi», – dedi Máýlen Áshimbaev.
Sonymen qatar Senat spikeri Memleket basshysy Qasym-Jomart Toqaevtyń bastamasymen elimizde iske asyrylyp jatqan mańyzdy saiasi jáne demokratiialyq reformalarǵa toqtalyp ótti.
Kezdesýde BUU-nyń turaqty damý maqsattaryn iske asyrý máseleleri de talqylandy.
Senat tóraǵasynyń aitýynsha, biylǵy jyldyń basynda atalǵan maqsattardyń indikatorlaryn ulttyq múddege sáikestendirý aiaqtalǵan.
Mindetterdiń shamamen 80 paiyzy elimizdiń strategiialyq josparlaý qujattaryna sai integratsiialanǵan.
Senat spikeri sol maqsattardy iske asyrýda Parlament depýtattary úlken ról atqaratynyn aitty.
«Turaqty damý maqsattaryna qol jetkizýde ulttyq Parlamentterdiń mańyzy asa zor. Depýtattar tiisti zańdardy qabyldai otyryp, kózdelgen mindetterdi oryndaýdy qamtamasyz etedi. Osy rette Qazaqstan senatorlary Turaqty damý maqsattaryn iske asyrý jolynda yntymaqtasýǵa jáne yqpaldasýǵa daiyn ekenin jetkizgim keledi», – dedi Máýlen Áshimbaev.
Kezdesý sońynda Senat tóraǵasy BUU Bas Assambleiasynyń Halyqaralyq iadrolyq synaqtarǵa qarsy is-qimyl kúnine arnalǵan dástúrli plenarlyq otyrysyn ótkizý josparǵa engizilgeni úshin meimanǵa rizashylyǵyn bildirdi.
Máýlen Áshimbaev Qazaqstannyń bul kúnge erekshe mán beretinin aitty.
Sondai-aq, ol 29 tamyz - Semei poligonynyń resmi túrde jabylǵan kúni ekenin, bul Qazaqstan úshin ǵana emes, barsha adamzat úshin tarihi mańyzdy data sanalatynyn tilge tiek etti.
