Senat spikeri Máýlen Áshimbaevtyń tóraǵalyǵymen Palatanyń Biýro otyrysy ótti. Onda depýtattar aldaǵy jalpy otyrystyń kún tártibin talqylady jáne Májilisten kelip túsken zań jobasy komitetterge bólip berdi, dep habarlaidy "Ult aqparat".
«Biýroda kezekti Senat otyrysynyń kún tártibi anyqtaldy. Soǵan sáikes 22 qazan kúni senatorlar «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» zań jobasyn qaraidy. Sondai-aq, Palata otyrysynda depýtattar «Qazaqstan Respýblikasynyń keibir zańnamalyq aktilerine qaldyqtardy energetikalyq kádege jaratý, sý qorǵaý beldeýleri jáne júkterdi temirjol kóligimen tasymaldaý máseleleri boiynsha ózgerister men tolyqtyrýlar engizý týraly» zań jobasyn da qaraityn boldy», - delingen Senat baspasóz qyzmetiniń málimetinde.
Sonymen qatar Biýro otyrysynda Májilisten kelip túsken zań jobasy komitetterge bólinip berildi. Sonyń nátijesinde Konstitýtsiialyq zańnama, sot júiesi jáne quqyq qorǵaý organdary komiteti «1994 jylǵy 9 qyrkúiektegi Eýraziialyq patent konventsiiasyna ónerkásiptik úlgilerdi qorǵaý týraly hattamany ratifikatsiialaý týraly» zań jobasy boiynsha bas komitet bolyp belgilendi.
Otyrys barysynda Senat tóraǵasy Máýlen Áshimbaev 23 qazan kúni ótetin Parlamenttik tyńdaýǵa nazar aýdardy. Tyńdaý kezinde qatysýshylar aýyldyq aýmaqtardy áleýmettik-ekonomikalyq damytý máselelerin jáne olardyń perspektivalaryn talqylaidy.
