Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine kórneki aqparat jáne dini qyzmet máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten, zań jobasy Májiliske qaitaryldy, dep habarlaidy QazAqparat.
Budan buryn habarlanǵandai, atalǵan qujat aiasynda syrtqy jarnamalardyń qazaq tilinde durys jazylýyna ekpin qoiylyp otyr.
«Búgin qaralǵan zań jobasy aqparatqa qoljetimdilikti qamtamasyz etý maqsatymen kórneki aqparatty jazýǵa qoiylatyn talaptardy naqtylaidy. Bul kólik jáne saýda salasynda, dári-dármekter men meditsinalyq zattardy tańbalaýǵa, poshta qyzmetterin kórsetýge qatysty. Sonymen qatar, ákimshilik-aýmaqtyq birlikterdiń tarihi qalyptasqan ataýlarynyń jazylýyna qoiylatyn talaptardy belgileidi. Zań jobasy dini bostandyq salasyndaǵy ózgeristerdi de qarastyrady. Bul rette senatorlar qujatqa ar-ojdan bostandyǵyn qamtamasyz etýge jáne dini is-sharalar ótkizý tártibin jeńildetýge arnalǵan birqatar mańyzdy ózgerister engizdi. Bul túzetýlerge halyqaralyq sarapshylar oń baǵa berdi», - dedi Senat tóraǵasy Máýlen Áshimbaev.
Zań jobasy:
- kórneki aqparattardyń durys emes rásimdelýine, mátinderdiń bir tilde ǵana ornalastyrylýyna, durys aýdarylmaýyna qatysty tiisti talaptardyń buzylýynyń aldyn alý, qoǵamda til saiasatyna qatysty oń kózqaras qalyptastyrý;
- konfessiiaaralyq kelisim jáne ózara is-qimyl jasaý úshin qolaily jaǵdailar týǵyzý;
- din salasynda jeke jáne zańdy tulǵalardyń quqyqtaryn qamtamasyz etý maqsatynda ázirlenip otyr.
Senator Aigúl Qapbarovanyń aitýynsha, zań jobasy birinshi oqylymda maquldanǵannan keiin, Komitetpen talqylaý barysynda Májilis maquldaǵan zań jobasyna kelesi máseleler boiynsha ózgerister engizý qajettiligi týyndady:
- «dini mazmundaǵy aqparattyq material» termininiń redaktsiiasyn naqtylaý, maǵynalyq jáne quqyqtyq júktemeniń bolmaýyna bailanysty anyqtamadan «mátindik siltemelerdi qosa alǵanda» degen sózderdi alyp tastaý;
- «Dini qyzmet jáne dini birlestikter týraly» zańda ar-ojdan bostandyǵy quqyǵyn júzege asyrý parametrlerin anyqtaý;
- ǵibadat úilerinen (ǵimarattardan) tys ótkiziletin dini is-sharalardy aldyn ala habarlama berý nemese bermeýi boiynsha naqtylaý, sáikesinshe ǵibadat etý oryndarynda, zirattar men krematoriilerde, turǵyn úilerde, qoǵamdyq tamaqtaný obektilerinde júrgiziletin dini is-sharalar habarlanbaityn bolady, óitkeni olar zańnamaǵa sáikes kedergisiz júrgizilýge tiis;
- dini birlestikterdiń ǵibadat úilerinen (ǵimarattardan) tys jerlerde dini is-sharalar ótkizý týraly habarlama berý rásimin jeńildetý.
«Atap aitqanda, habarlama berý tártibinen qoǵamdyq tártipti saqtaýdy qamtamasyz etýge, meditsinalyq kómekti jáne ózge de qajetti kómekti uiymdastyrýǵa járdemdesý sharalary boiynsha talaptardy, avtomobil kóligi quraldaryn paidalanýda olardyń sanattaryna, baǵyttyń uzyndyǵyna, bastalý jáne aiaqtalý ornyn qosa alǵanda, olardyń júrý baǵytyna qatysty talaptardy jáne dini birlestik basshysynyń habarlamada kórsetilgen aqparattyń tolyqtyǵy boiynsha jaýaptylyǵyna qatysty talaptardy alyp tastaý syndy jeńildetý sharalary usynylady», - dedi senator.
