Búgin QR Indýstriia jáne infraqurylymdyq damý ministri Roman Skliar Senat depýtattaryna «Qazaqstan Respýblikasynyń keibir zańnamalyq aktilerine kólik máseleleri boiynsha ózgerister men tolyqtyrýlar engizý týraly» Zań jobasyn tanystyrdy.
Zań jobasy joldarda kólik baqylaýyn avtomattandyrý, jolaýshylardy jáne bagajdy tasymaldaý sapasyn arttyrý, temir jol jáne teńiz kóligine tekserý júrgizý tártibin jetildirý, kólik quraldaryn qaýipsiz paidalanýdy arttyrý, Halyqaralyq teńiz uiymy (IMO) aýditiniń eskertýlerin joiý, azamattyq aviatsiiany memlekettik retteýdiń tiimdiligin jaqsartý, biýdjettik áýe kompaniiany jáne ulttyq áýe júk tasymaldaýshysyn qurý, sondai-aq basymdyqqa ie halyqaralyq áýe marshrýttaryn damytý siiaqty birqatar máselelerdi sheshýge jáne júieleýge baǵyttalǵan.
Zań jobasy 6 kodekske, 20 zańǵa ózgerister men tolyqtyrýlar engizýdi qarastyrady.
Ministrdiń aitýynsha, kólik quraldaryn tekserý negizderiniń naqty tizbesin aiqyndaý arqyly joldardaǵy baqylaý tártibin ózgertý usynylady. Bul kólik quralyn toqtatpai-aq ruqsat berý qujattarynyń bar-joǵyn tekserýge, kólikti baqylaý organdarynyń kólik quraldaryn jappai toqtatý tájiribesinen bas tartýǵa múmkindik beredi.
«Zań jobasynda qazaqstandyq tasymaldaýshylarǵa shekaraǵa jaqyn bir oblystyń aýmaǵynda ornalasqan eldi mekender arasynda tasymaldaýdy júzege asyrýǵa ruqsat berý usynylady. Bul túzetýdi qabyldaý 126 halyqaralyq marshrýt boiynsha qosymsha shekaralas oblystardaǵy 300-dei eldi mekenniń jolaýshylaryn turaqty tasymaldaýǵa jol ashady», - dep atap ótti Roman Skliar.
