QR Parlamenti Senatynyń depýtaty, ekonomikalyq saiasat, innovatsiialyq damý jáne kásipkerlik komitetiniń múshesi Súiindik Aldashev «Samuryq-Energo», KEGOC kompaniialaryn Energetika ministrliginiń qaramaǵyna berýdi usyndy, dep habarlaidy QazAqparat.
QR Parlamenti Senatynda ótken dóńgelek ústelde eldegi eń iri energetikalyq kompaniialardy qaita qurylymdaý usynyldy.
«Bizde elektr energetikasy salasyndaǵy taýarlar men qyzmetterdi memlekettik satyp alýlardyń ashyq bolmaý problemasy bar. Esep komitetiniń dereginshe, 2017-2019 jyldary KEGOC AQ satyp alǵan taýarlar men qyzmetteri 74 paiyzy básekege qabiletti emes tásildermen iske asyrylǵan. Osy aitylǵandardyń negizinde elektr energetikasy salasyn basqarýdyń tiimsiz modeli qalyptasqanyn málim etýge bolady. Bul problemalardyń bári jyldar boiy qordalanǵan jáne tiisti sheshimin taba alǵan joq. Negizgi qordyń aitarlyqtai tozýy, qýattyń jetkilikti júktelmeýi jáne energetikalyq kásiporyndardyń orasan shyǵyny siiaqty máselelerdiń sheshimin tappaýy tutynýshylar úshin baǵanyń ósýi túrinde ǵana kórinis taýyp otyr. Iaǵni, halyqtyń, zańdy tulǵalar men biýdjet esebinen ǵana sheshilip keledi», -dedi senator.
Onyń aitýyna qaraǵanda, bul problemalardy túbirimen joiý úshin Energetika ministrligine tez arada elektr energetikasy salasyn sapaly reformalaý qajet.
«Birinshi – Energetika ministrliginiń rólin arttyra otyryp, salany basqarý júiesin qurylymdyq turǵyda túrlendirý kerek. «Samuryq-Energo» jáne «KEGOK» AQ-ny biryńǵai ulttyq retteýshi retinde Energetika ministrliginiń qaramaǵyna berý qajet. Bul jerde «KEGOK» AQ-nyń fýnktsiialaryn qaita qarap, ony energiia berýshi uiym retinde qurylymdap, ózine tán emes fiýnktsiialardan bosatý kerek. Bul Memleket basshysynyń «Samuryq-Qazyna» qoryn reformalaý týraly tapsyrmalarymen sáikes keledi», - dedi Senat depýtaty.
