Búgin QR Ortalyq sailaý komissiiasynyń otyrysynda Parlament Senaty depýtattyǵyna kandidattardy tirkeý kezeńiniń qorytyndylary qaraldy, dep habarlaidy QazAqparat.
«2020 jylǵy 24 shildedegi jaǵdai boiynsha, elimizde Senat depýtattyǵyna sailaý komissiialary 58 kandidatty tirkedi. Ortasha alǵanda bir orynǵa úsh úmitker bar», - dedi QR Ortalyq sailaý komissiiasynyń tóraǵasy Berik Imashev.
Onyń sózine qaraǵanda, óńirler arasynda eń kóp kandidattar sany Nur-sultan qalasynda jáne Aqmola oblysynda – 5 adam tirkelgen. Kandidattardyń ortasha jasy - 50,9.
Senat depýtattyǵyna kandidattar arasynda áielderdiń saiasi belsendiligi saqtalǵanyna toqtalǵan ol: «tirkelgen kandidattardyń arasynda 10 áiel adam bar, iaǵni 17,2 paiyzdy qurady. Ótken sailaýmen salystyrǵanda, bul kórsetkish shamamen eki esege ósti», - dedi.
Aita keteiik, osy jyldyń 12 maýsymynda Memleket basshysy Qasym-Jomart Toqaevtyń Senat depýtattarynyń sailaýyn 2020 jylǵy 12 tamyzǵa taǵaiyndaý týraly qaýlysy shyqqan edi.
Osyǵan orai QR Ortalyq sailaý komissiiasynyń onlain rejimde otyrysy ótip, onda sailaýǵa qatysty kúntizbelik is-sharlar jospary bekitilgen. 13 maýsymnan bastap Senat depýtattyǵyna kandidattardy usyný bastaldy. Sondai-aq úmitkerlerge qoiylatyn talaptar jariia etildi.
