Parlament Senatynda «QR-nyń keibir zańnamalyq aktilerine biznes-ahýaldy jaqsartý máseleleri boiynsha ózgerister men tolyqtyrýlar engizý týraly» zań jobasy maquldandy, dep habarlaidy QazAqparat.
Zań jobasy boiynsha qorytyndyny oqyǵan Senattyń Ekonomikalyq saiasat, innovatsiialyq damý jáne kásipkerlik komitetiniń tóraǵasy Serik Jaqsybekov zańnyń maqsaty týraly aityp ótti. Onyń aitýynsha, zań jobasymen Jer, Biýdjet, Kásipkerlik jáne Azamattyq protsestik kodeksterine, sondai-aq taǵy birneshe zańǵa ózgerister men tolyqtyrýlar engiziledi.
«Zań jobasynyń mindeti - taýar naryqtaryndaǵy básekelestik ortanyń jai-kúiin jaqsartý, birqatar kórsetiletin qyzmetterdi elektrondy formatqa kóshirý, memlekettiń kásipkerlik qyzmetke qatysýyn qysqartý, monopoliiaǵa qarsy den qoiý sharalarynyń tiimdiligin arttyrý. Zań jobasy tehnikalyq jaǵynan kúrdeli emes nysandar úshin keshendi saraptamanyń, tehnikalyq jáne avtorlyq qadaǵalaýdy jaldaý mindettemesiniń kúshin joiýdy, táýekeli tómen qurylys nymandaryn mindetti saraptamadan alyp tastaýdy, menshik ieleriniń kelisiminsiz úshinshi tulǵalar úshin jyljymaityn múlikke aýyrtpalyq týraly aqparatqa jariia qoljetimdilikti ashýdy kózdeidi. Sondai-aq, jyljymaityn múlikke satyp alý-satý mámilesine óndiristik tirkeý týraly belgi qoiý mindettiliginiń kúshin joiýdy, azamattyq aviatsiia salasyndaǵy ýákiletti organnyń áýejaidyń aýmaǵynda áýejai qyzmetine jatpaityn qyzmetterdi kórsetýge qoljetimdilik qaǵidalaryn bekitýdi qarastyrady», - dedi ol.
Zań jobasyn qabyldaý arqyly «Doing Business» halyqaralyq reitingi baǵalaityn biznes-ahýaldy jaqsartý kózdelgen. Sonymen birge taýar naryqtaryndaǵy básekelestik ortanyń jai-kúiin jaqsartý, jarnama salasyndaǵy jarnamany jetildirý, jekeshe kásipkerlikti memlekettik retteý protsesiniń ashyqtyǵyn arttyrý mindeti de bar.
