Semeige elimizdiń astanasy Nur-Sultan qalasynan dizainerlik top keldi. Olar Abai alańyn jańadan jabdyqtamaq. Semei qalasynyń ákimi Ermak Sálimov pen meditsina ýniversitetiniń rektory Ersin Júnisov astanalyq dizainerlermen kezdesti. Abai alańynda bolyp, dizainin qalai ózgertýdi qarastyrdy.
- Ýniversitet Nur-Sultan qalasynan kásibi mamandardy shaqyryp otyr. Olar alańnyń jańa jobasyn usynbaqshy. Biz olardyń jobasyn qarap bolǵan soń, qarjylandyrý máselesin sheshemiz, - dedi Ermak Sálimov.
Rektor Ersin Júnisovtyń aitýynsha, joba áli qarastyrylymda bolsa da kúzde 40 shyrsha aǵashyn otyrǵyzý josparda bar.
- Aǵashtardy Ridderdegi pitomnikterden ákelmek. Osyndaǵy otyratyn oryndyqtar jańaryp, bul jerdi qaraityn baǵban bekitiletin bolady. Abai eskertkishin de jańartamyz, - dedi rektor.
Abaidyń 175 jyldyǵyna orai alań túbegeili ózgertilmek. Aita ketý kerek, jaqynda qala ákimdigi men meditsina ýniversiteti aiasynda memorandým bekitilip, Abai alańy meditsina ýniversitetiniń qamqorlyǵynda bolatyndyǵy jaily aitylǵan edi.
