Biyldan bastap Semei qalasynda qoǵamdyq kólikte jol júrý 1 jáne 2 toptaǵy barlyq múgedektermen qosa, eń tómengi zeinetaqy alatyn zeinetkerler úshin tegin bolady dep josparlanýda. Bul týraly esep berý kezdesýinde Semei qalasynyń ákimi Nurymbet Saqtaǵanov málimdedi, dep habarlaidy ShQO ákimdiginiń baspasóz qyzmeti.
– Bizdiń josparymyzda 70 jastan asqan zeinetkerlerge qoǵamdyq kólikte 50% jeńildikpen jol júrý jeńildikterin berý kózdelgen. Sondai-aq, 1 jáne 2 toptaǵy barlyq múgedekter men eń tómengi zeinetaqy alatyn zeinetkerlerdi qoǵamdyq kólikte tegin qatynaý sanatyna qosýdy josparlap otyrmyz. Jalpy, qalamyzda qoǵamnyń osal tobyndaǵy azamattardy áleýmettik qoldaý jáne qorǵaý máselesi basty nazarda. Osyǵan bailanysty, ótken jyly ataýly áleýmettik kómekpen 1,3 mlrd.teńge somasyna 3 myńnan astam otbasy qamtyldy. Budan bólek, 283 otbasy, onyń ishinde 147 kópbalaly jáne 85 az qamtylǵan otbasy baspanaly boldy, - dedi Nurymbet Saqtaǵanov.
Ótken jyly sýmen jabdyqtaý jáne sý burýdyń 13 nysany iske qosyldy. 5,5 shaqyrym sý qubyry jelileri qaita jańartyldy. Boztaev jáne Qabanbai batyr kósheleri boiy men oń jáne sol jaǵalaý aiyryqtaryna 808 zamanaýi energotiimdi shamdar ornatyldy. 3,7 mlrd. teńgege 50 shaqyrym avtojol jóndeldi, 1,6 mlrd. teńgege «Semei-Qainar» avtojolynyń 46 shaqyrymy ortasha jóndeýden ótti.
Jiyn barysynda sheshimin turǵyndar kútip júrgen birqatar mańyzdy suraqtar qoiyldy.
- Osy qysta páterlerde óte sýyq bolǵanyn bári jaqsy biledi. 103 qazandyǵynda jii apattar boldy. Nelikten jylytý kózderin jaz maýsymynda daiyndamaidy. Biyl qys maýsymyna daiyndyq boiynsha qandai jumystar josparlanýda, qansha qarajat qarastyrylady? – dep surasa Márziia Joljaqsynova, qala turǵyny Elvira Júnisova avtobýstarǵa shaǵym aitty:
- Keshki ýaqytta qoǵamdyq kóliktiń jumysy baqylanady ma? Turǵyndar keshki saǵat segizden bastap úilerine áreń jetedi, - dedi ol.
Qala ákiminiń aitýynsha, 2020-2021 jyldardaǵy jylý berý maýsymynda shyn máninde 103, 103a qazandyqtarynda máseleler týyndady.
Qazirgi ýaqytta jylý berý maýsymyn apatsyz aiaqtaýǵa múmkindik beretin is-sharalar jospary ázirlenip, másele oń sheshimin tapty. Jóndeý jumystaryna jergilikti biýdjetten 349 mln. teńge bólinip, oblystyq biýdjetten 888,8 mln.teńge qarastyrylýda. Al, qoǵamdyq kólikterge keletin bolsaq, Jolaýshylar tasymalyn basqarý ortalyǵy avtobýs marshrýttaryna tikelei monitoring júrgizýmen ainalysady. Olardyń aitýynsha, keshki ýaqytta jolaýshylardyń aǵyny azaiǵan saiyn avtobýstar da azaiady. Osy oraida, bul máseleni egjei-tegjei Semei qalasy ákimdigi avtobýs parkiniń basshylarymen birlesip, tekseretin bolady, - dedi Semei qalasynyń ákimi.
Kezdesýge qatysqan óńir basshysy Danial Ahmetov Óskemen men Semei qalalarynyń bilim berý júiesindegi problemalardy atap ótti.
– Biyl biz Semei qalasynda eki mektep qurylysyn bastaimyz. Bireýi 300, ekinshisi 1200 oryndyq. Sochi qalasyndaǵy «Siriýs» biregei bilim berý ortalyǵy siiaqty bilim oshaǵyn Semeide ashýdy josparlaýdamyz. Maqsatymyz IT baǵdarlamalaý turǵysynan bilim berý júiesiniń deńgeiin kóterý. Sondai-aq, úshtildi oqytýdy odan ári damytýymyz kerek. Jalpy, salystyrmaly túrde Semei jáne Óskemen qalalarynyń oqý oryndary máselen Aiagóz ben Kókpekti aýdanynan aitarlyqtai artta qalyp otyr. Sondyqtan, Semei qalasynyń bilim berý júiesin barynsha damytýymyz kerek, - dedi ShQO ákimi D. Ahmetov.
Onlain-eseptik kezdesýdiń sońynda Semei qalasynyń ákimi 2021 jylǵa arnalǵan josparymen bólisti. «Narodnaia» jáne «Okean» aialdamalaryndaǵy eki jer asty ótkelderin 24 mln.teńgege jóndeý josparlanǵan. 6 myń sharshy metrden astam trotýarlar jóndeledi. Avtobýs aialdamalarynda 14 jańa pavilon ornatylady.
